وتارى سەرۆکى هەرێمى کوردستان لە ئامێدى

دهۆک – AA
لە میانى بەڕێوەچوونى کەرنەڤاڵى جەماوەرى ئامێدى بۆ سەرخستنى ریفراندۆمى هەرێمى کوردستان، سەرۆکى هەرێمى کوردستان، مەسعود بارزانى لە وتارێکیدا رایگەیاند "تاوەکو ئێستا بەدیلی گشتپرسی نییە و بەبێ بەدیلیێکى بەهێزتر لە ریفراندۆم بەهیچ شێوەیەک ریفراندۆم دواناخەین، هەموو لایەکتان دڵنیا دەکەینەوە کە ریفراندۆم ئامانج نیيە، بەڵکو ئامرازێکە بۆ بەدیهێنانى ئامانجێکى گەورە کە سەربەخۆییە".
سەرۆکى هەرێمى کوردستان لەبارەى هەڵوێستى نێودەڵەتى گوتى: "بێگومان ئاگادارن و پرسى ريفراندۆم بووه‌ته‌ بابه‌تى گرنگ له‌ ميدياى جيهانيدا و هه‌رگيز نه‌مانگوتووه‌ ئه‌و وڵاته‌ به‌ڵێنى داوه‌ و سه‌ربه‌خۆييمان به‌ ديارى ده‌داتێ و ئه‌گه‌ر به‌ ته‌ماى ئه‌وه‌ بين هه‌تا دنيا ماوه‌ نايبينين، بەڵکو پێويسته‌ ئێمه‌ داواى مافى خۆمان بكه‌ين و ئه‌و خوێنه‌ى گه‌لى كوردستان داويه‌تى شایستەى دە سه‌ربه‌خۆييه‌ نه‌ك يه‌ك سەربەخۆیی، كه‌سيش نه‌هاتووه‌ بڵێت دژى سه‌ربه‌خۆيى كوردستان و دژى ریفراندۆمین و ته‌نيا ده‌ڵێن ئێستا كاتى نييه‌، ئه‌ى كێ كاتييه‌تى؟ ئەوانیش هیچ وەڵامێکیان نەبووە".
بارزانى تکاى لە هاووڵاتییانى هەرێمى کوردستان کرد کە خۆیان بە هه‌واڵى ته‌له‌ڤزيۆن و لێدوانى ئه‌م و ئه‌و خه‌ريك نه‌كه‌ن و تا ئێستا به‌ديلى ريفراندۆم نه‌هاتووه‌ بۆمان و ريفراندۆم ئامرازه‌ بۆ سه‌ربه‌خۆيى و ئامانج نييه‌ بۆ ئێمه‌ و سه‌ربه‌خۆيى ئامانجه‌ بۆ ئێمه‌ و ئه‌گه‌ر سه‌ربه‌خۆيى بێت، ريفراندۆم هيچ پێويست ناكات و ئه‌گه‌ر نا ريفراندۆم دوا ناخه‌ين".
بارزانى سه‌باره‌ت به‌ داواكارى بۆ كشانه‌وه‌ى كورد بۆ هێڵى سه‌وز، گوتى: "كێ وتوويه‌تى ئه‌وه‌ سنوورى كوردستانه‌ و ئێمه‌ ئاماده‌ نيين يه‌ك خولەک گفتوگۆ‌ له‌سه‌ر ئه‌وه‌ بكه‌ين و ته‌نيا له‌ شه‌ڕى داعشدا ده‌يان رۆڵه‌مان له‌ پێناو ئه‌و خاكه‌ شه‌هيد بووه‌ و يان سه‌ربه‌خۆ دەببن يان ژێر ده‌سته‌يى قبوڵ ناكه‌ين".
سەرۆکى هەرێمى کوردستان ئاماژەى بەوەدا کە وایاندەزانى له‌ پاداشتى ئه‌و هه‌موو خوێن و شه‌هيده‌ و دواى شكاندنى ئەستوورەى داعش، دێن ده‌ڵێن سه‌ربه‌خۆيى مافى ئێوه‌يه‌، ئه‌ى كوا بنەما و بڕواتان به‌ ئازادى و مافەکانى مرۆڤ و ديموكراسى گه‌لان، مادام ئێوه‌ به‌و جۆره‌ن ئێمه‌ش به‌رده‌وام ده‌بين له‌سه‌ر رێگه‌ى خۆمان، خه‌ڵكى كوردستان شه‌رعييه‌ت ده‌داته‌ ريفراندۆم نه‌ك خه‌ڵكى ده‌ره‌وه‌ و مادام ئه‌وان به‌و جۆره‌ دژايه‌تى ده‌كه‌ن ئێمه‌ش حیساب بۆ ره‌ئى يه‌ك به‌شه‌ر ناكه‌ين".
سەرۆکى هەرێمى کوردستان لەبارەی بڕیاری پەرلەمانی عێراق بۆ رەتکردنەوەی ریفراندۆم و لەکارلادانی پارێزگارى کەرکووک نەجمەدین کەریم،گوتى : "خۆتان ماندوومەکەن بڕیارەکانتان ناگەنە کوردستان، ئێمه‌ لامه‌ركه‌زى و حوكمى زاتى و فيدراڵييه‌تمان قبوڵ كرد به‌ڵام هيچ ئه‌نجاميان نه‌بوو، باشە دراوسێى باش بين و به‌يه‌كه‌وه‌ بژين به‌ ئاشتى يان له‌ كێشه‌ و قه‌يراندا بين و كاميان باشتره، ئه‌م بڕياره‌مان کە ٧ى حوزەیران درا بڕبارێکى بوێرانەبوو، موجازه‌فه‌ى تێدايه‌، به‌ڵام موجازه‌فه‌ى چاوه‌ڕوانى زۆر مه‌ترسيدارتره‌ له‌وه‌ى بڕيار بده‌ين. مه‌سه‌له‌كه‌ ئيراده‌يه‌ و كاتى ئه‌وه‌يه‌ ئيراده‌ى به‌هێزمان هه‌بێت و ئه‌گه‌ر ئه‌وه‌ش هه‌بێت ده‌ستكه‌وتى مه‌زن به‌ده‌ست ده‌هێنين".