ئافاد: "لە بوومه‌له‌رزه‌كه‌ی ئه‌لعه‌زیزدا، ٢٩ کەس گیانیان له‌ده‌ستداوه‌"

ئەنقەرە - AA

سەرۆکایەتی ئیدارەی کارەسات و باری لەناکاوی تورکیا (AFAD)، بڵاویکردەوە کە ژمارەی ئەوانەی بەھۆی ئەو بوومەلەرزەیەی بە گوڕی ٦،٨ پلە لە شارۆچکەی سیڤریجە لە ئەلعەزیز روویدا گیانیان لەدەستداوە بەرزبووەتەوە بۆ ٢٩ کەس، ژمارەی بریندارانیش گەیشتووەتە ھەزار و ١٥ کەس.

ئافاد لە راگەیەندراوێکدا ئاماژەی بەوە کرد کە دوای بوومەلەرزەکەی سیڤریجە لە کاتژمێر ٠٧:٥٠ خولەکەوە، ١١ پاشلەرزە بە گوڕی چوار پلە و بەرەوسەر روویانداوە.

لە راگەیەندراوەکەدا باس لەوە کراوە کە چوار بینا لە ناوەندی ئەلعەزیز رووخاون، تیمەکانی ئافادی-ش بەردەوامن لەسەر کارەکانی گەڕان و رزگارکردن و، ئەو کەسانەشی لە بەشە ناوخۆییەکان ماونەتەوە گوازراونەتەوە بۆ ھۆڵە وەرزشییەکان.

ھەروەھا لە راگەیەندراوەکەدا زانیاری دراوە سەبارەت بە ژمارەی قوربانیان و ئاماژە بەوە کراوە کە ژمارەی ئەوانەی گیانیان لەدەستداوە گەیشتووەتە ٢٩ کەس و، بریندارانیش ھەزار و ١٥ کەس.

لە راگەیەندراوەکەدا ھاتووە ''فڕۆکەخانەی ئەلعەزیز لە کاردایە. بۆ ماوەیەکی کەم پچڕان لە تۆڕی پەیوەندی روویدا و لە ماوەیەکی کورتدا چارەسەرکرا. ھیچ کێشەیەک لە تۆڕی کارەبا و غازی سروشتیدا نییە. ئەو شەمەندەفەرانەی دەچنە ناوچەکە لە نزیکترین وێستگەن''.

ھەروەھا لە راگەیەندراوەکەدا ھاتووە ''لە پارێزگاکانی دیکەوە UMKE و لە ٣٩ تیمی ئاگرکوژێنەرەوە تێکڕا ھەزار و ١٦٢ کارمەندی گەڕان و رزگارکردن و ٢٣٣ ئۆتۆمبێل رەوانەی ناوچەکە کراون. ھەروەھا بەمەبەستی ھاوکاریکردنی کارەکان ١٥ سەگی گەڕان و رزگارکردن رەوانەی ناوچەکە کراون. ئامێرەکانی کارکردن لەبەردەستدان و لە کاتی پێویستیدا بەکاردەھێنرێن. جگە لەو ئامێرانەی کارکردن کە بەھەماھەنگیی ئافاد لە ناوچەکەدا کاردەکەن ھیچ ئامێرێکی دیکە کار ناکات''.

لە راگەیەندراوەکەدا باس لەوە کراوە کە سەرۆکایەی ئافاد لە رێگەی ١٤٤ بارھەڵگرەوە شەش ھەزار و ٦٥ چادری خێزانی، ٤٠٠ چادری ھەمەجۆر، ١١ ھەزار و ٥٣٢ پێخەف و ١٨ ھەزار و ٧٢٠ بەتانی رەوانەی ناوچەکە کردووە. ھەروەھا مانگی سووری تورکی، ٢٠٢ کارمەند، ٢٩ ئۆتۆمبێل، حەوت ئۆتۆمبێلی خواردن دابەشکردن و چوار چێشتخانەی گەڕۆک و ١٥ ھەزار و ٧٤٧ بەتانی، پێنج ھەزار و ٦٥٦ پێخەف، ھەزار و ٥٦٣ زۆپا، دوو ھەزار و ٥٠٠ چادر، ١٩٣ ھەزار و ٤٢٠ کگم ئارد و سێ ھەزار و ٢٠٠ کارتۆن خۆراک رەوانەی ناوچەکە کراوە.

لە لایەکی دیکەوە، بە ھۆی پێداویستیە بە پەلەکانەوە دەستکراوە بە رەوانەکردنی تیمە پەیوەندیدارەکان بۆ ناوچەکە وەک؛ دەستەبەرکردنی شوێنی مانەوە، دیاریکردنی زیان، دابینکردنی خۆراک و وزە. لەو چوارچێوەیەشدا ١٤٣ کارمەند و ٤٧ ئۆتۆمبێل رەوانە کراون.