ئەنقەرە..بڕیاری دادگا لەسەر ھێرشە تیرۆریستییەکەی شەقامی مەراسیم

ئەنقەرە -AA

ئەمڕۆ لە کۆتا دانیشتنی دادگا لەسەر دۆزی تەقینەوەی بۆمبێک لە شەقامی مەراسیمی شاری ئەنقەرە و گیانلەدەستدانی ٢٩ کەس بەم ھۆیەوە، بڕیاری کۆتایی دەرکرا، کە لە نێویان بەپرسانی باڵای پەکەکەشی تێدایە.

ئەمڕۆ لە ھۆبەی ١٤یەمینی دادگای سزای قورسی ئەنقەرە، تۆمەتباران کۆتا وتەیان لێ وەرگیرا و پاشانیش بڕیاری کۆتایی لەسەر ئەو دۆزە دەرکرا.

بەم پێیەش لە چوارچێوەی لێکۆڵینەوە لە دۆزی تەقینەوەی بۆمبێک لە شەقامی مەراسیمی شاری ئەنقەرە و گیانلەدەستدانی ٢٩ کەس بەم ھۆیەوە، ٣٠ جار سزای قورسی ھەتا ھەتایی بەسەر شەش کەسدا سەپێنرا.

ھێرشە تیرۆریستییەکەی شەقامی مەراسیمی شاری ئەنقەرە

لە ١٧ی شوباتی ٢٠١٦، ئۆتۆمبێلێکی بۆمبرێژکراو لەکاتی وەستانی ئۆتۆمبێڵی سەربازیی و سڤیل لە ترافیکی شەقامی مەراسیمی شاری ئەنقەرە تەقییەوە و بەم ھۆیەوەش ٢٩ کەس گیانیان لەدەستدا و ٨٧ کەسیش برینداربوون، ھاوکات ژمارەیەکی زۆری بینا و ئۆتۆمبێڵی ناوچەکە زیانیان بەرکەوتبوو.