په‌یامی ئه‌ردۆغان بۆ رێوره‌سمی ئایینی خانه‌ی پاتریاكی ئه‌رمه‌نی له‌ ئیستانبوڵ

ئه‌نقه‌ره‌ - AA

سه‌ركۆماری توركیا، ره‌جه‌ب ته‌یب ئه‌ردۆغان رایگه‌یاند: "بوونه‌ هاوبه‌شی ئه‌و ئازارانه‌ی كه‌ هاووڵاتییه‌ ئه‌رمه‌نییه‌كانمان له‌ مێژوودا به‌سه‌ریاندا هاتووه‌، به‌شكردنی ئه‌و ئازارانه‌ له‌گه‌ڵیاندا، پێویستییه‌كی هه‌ڵوێستی ویژدانیی و ئه‌خلاقیی گه‌لی توركه‌".

ناوه‌ندی راگه‌یاندنی سه‌رۆكایه‌تی كۆمار رایگه‌یاند، سه‌ركۆماری توركیا، ره‌جه‌ب ته‌یب ئه‌ردۆغان په‌یامێكی ئاڕاسته‌ی رێوره‌سمی ئایینی خانه‌ی پاتریاكی ئه‌رمه‌نی له‌ ئیستانبوڵ كردووه‌.

سه‌ركۆماری توركیا جارێكی دیكه‌ به‌ڕێز و پێزانینه‌وه‌ یادی ئه‌رمه‌نه‌ عوسمانییه‌كانی كردۆته‌وه‌ كه‌ له‌ جه‌نگی جیهانی یه‌كه‌م گیانیان به‌خت كردووه‌ و پرسه‌ و سه‌ره‌خۆشی خۆیشی ئاڕاسته‌ی منداڵ و نه‌وه‌كانیان كرده‌وه‌.

له‌ په‌یامه‌كه‌دا هاتووه‌: "بوونه‌ هاوبه‌شی ئه‌و ئازارانه‌ی كه‌ هاووڵاتییه‌ ئه‌رمه‌نییه‌كانمان له‌ مێژوودا به‌سه‌ریاندا هاتووه‌، به‌شكردنی ئه‌و ئازارانه‌ له‌گه‌ڵیاندا، پێویستییه‌كی هه‌ڵوێستی ویژدانیی و ئه‌خلاقیی گه‌لی توركه. خوا یار بێ له‌ قۆناغه‌كانی داهاتوو ده‌بینه‌ هاوبه‌شی خه‌مه‌كانتان و به‌رده‌وام ده‌بین له‌ چاره‌سه‌ركردنی كێشه‌كانتان. به‌ هه‌ر كلۆجێك بێ ناهێڵین به‌هۆی جیاوازی ئایین و باوه‌ڕه‌وه‌ جیاكاری به‌رامبه‌ر یه‌ك هاووڵاتیشمان بكرێ. له‌و باوه‌ڕه‌دام هاووڵاتییه‌ ئه‌رمه‌نه‌كانمان به‌رده‌وام ده‌بن له‌ سوودگه‌یاندن به‌ وڵات له‌ رووی كولتووری، مرۆیی، سیاسیی و بازرگانی. داواتان لێده‌كه‌م، رێگه‌ به‌وانه‌ نه‌ده‌ن، هه‌وڵی شێواندنی مێژووی هاوبه‌شمان و دروستكردنی رق و كینه‌ ده‌ده‌ن هه‌روه‌ك ئه‌وه‌ی تاوه‌كو ئه‌مڕۆ رێگه‌تان پێیان نه‌داوه‌. دیسانه‌وه‌ به‌ڕێز و پێنزانینه‌وه‌ یادی ئه‌و ئه‌رمه‌نه‌ عوسمانیانه‌ ده‌كه‌ینه‌وه‌ كه‌ له‌ جه‌نگی جیهانی یه‌كه‌م گیانیان به‌خت كرد. سڵاو و رێزیشم هه‌یه‌ بۆ به‌شداربووانی ئه‌م رێوڕه‌سمه‌".