بۆ کۆبوونەوە لەگەڵ ماکرۆن، نێچیرڤان بارزانی گەیشتە بەغدا

هەولێر ــ AA

راگەیەندرا كە سەرۆكی هەرێمی كوردستان، نێچیرڤان بارزانی بە سەرۆكایەتی شاندێكی باڵا بە مەبەستی ئەنجامدانی كۆبوونەوەی لەگەڵ سەركۆماری فەڕەنسا، ئیمانوێل ماكرۆن و بەرپرسانی باڵای عێراق، گەیشتە بەغدا.

ئەم سەردانەی سەرۆكی هەرێمی كوردستان، نێچیرڤان بارزانی بۆ بەغدا، دوای ئەوە دێت كە سەركۆماری فەڕەنسا، ئیمانوێل ماكرۆن بگاتە بەغدا و چاوەڕوان دەكرێت لەگەڵ بەرپرسانی عێراق كۆببێتەوە.

میدیاكانی خۆجێی بڵاویانكردەوە كە نێچیرڤان بارزانی لەچوارچێوەی سەردانەكەی بۆ بەغدا سەرەتا بە جیا لەگەڵ سەرۆكوەزیرانی عێراق، مستەفا كازمی و سەرۆكی ئەنجوومەنی نوێنەرانی عێراق، محەمەد حەلبوسی و سەرۆكی رەوتی حیكمەی نیشتمانی، عەممار حەكیم و سەركۆماری عێراق، بەرهەم ئەحمەد ساڵح كۆدەبێتەوە.

هەر بەپێی میدیاكانی خۆجێی دوای نیوەڕۆی ئەمڕۆ چوارشەممە نێچیرڤان بارزانی لە بەغدا لەگەڵ ئیمانوێل ماكرۆن كۆدەبێتەوە و ژمارەیەك رۆژەڤی گرنگ تاوتوێ دەكەن.

پێشتر ئیمانوێل ماكرۆن رایگەیاندبوو كە بەر لەكەمی كاتی سەردانەكەی بۆ بەغدا ناتوانێت سەردانی هەولێر بكات و بۆیە داوای لە نێچیرڤان بارزانی كردبوو كە لە بەغدا چاوی پێ بكەوێت.

پێشتر بۆ چەندین جار فەڕەنسا داوای لە حكوومەتی هەرێمی كوردستان و حكوومەتی عێراق كردووە كە بۆ چارەسەركردنی كێشە هەڵپەسێردراوەكانی نێوان هەولێر و بەغدا رێگەی گفتوگۆ بگرنەبەر.

فەڕەنسا یەكێك لە وڵاتانی ئەندام لە هاوپەیمانیەتی نێودەوڵەتی دژبە داعش بەڕابەرایەتی ئەمریكایە و رۆڵێكی كارا و گرنگی بینوە لە تێكشكاندنی داعش لە ناوچەكانی عێراق.