بەردەوامبوونی ھێرشەکانی ئیسرائیل بۆ سەر کەرتی غەززەی گەمارۆدراو

غەززە – AA

ھێرشەکانی سوپای ئیسرائیل کە لە ٧ی تشرینی یەکەمەوە بۆ سەر غەززە دەستی پێکردووە، لە ١١یەمین ڕۆژی خۆیدا بەردەوام بوو.

بەپێی ئەو زانیارییانەی کە لە سەرچاوە پزیشکییەکانەوە دەست کەوتوون، لە ئاکامی بۆردومانێکی ئیسرائیل بۆسەر خانوویەک لە رەفح باشووری کەرتی غەززە، ٢٥ کەس کوژراون و ژمارەیەکی دیکەیش برینداربوون.

سەرچاوەکان ئاماژەیان بەوەیشداوە کە ھەروەھا خانووەیەک لە دەیر بەلح ناوەڕاستی کەرتی غەززە لەلایەن ئیسرائیلەوە بۆردومان کراوە کە بەھۆیەوە حەوت کەس کوژراون و ١٢ی دیکەیش برینداربوون.

ھەر بەپێی ئەو زانیارییانەی کە دەستی پەیامنێری ئاژانسی ئانادۆڵو کەوتووە، کەمپی نوسەیرات ناوەڕاستی غەززە، لەلایەن ئیسرائیلەوە بەچڕی بۆردومان کراوە.

ھاوکات ئاژانسی ھەواڵی فەرمی فەڵەستین بڵاوی کردووەتەوە کە دەستدرێژییەکانی ئیسرائیل بۆسەر کەرتی غەززە بەردەوامە و ئاماژەی بەوەداوە کە تۆپخانەکانی ھێزی داگیرکار، ناوچەکانی ڕۆژھەڵاتی شاری غەززەیان بە چڕی بۆردومان کردووە.

دوێنێ دووشەممە، لە ئاکامی بۆردومانێکی ئیسرائیل بۆسەر باڵەخانەیەکی نیشتەجێبوون لە گەڕەکی زەیتون باشووری شاری غەززە، ڕۆژنامەنووسێک و دایکی ھاوسەرەکەی کوژران، ژمارەیەک کەسی دیکە لە خێزانی ڕۆژنامەنووسەکە برینداربوون.

ھەروەھا لە ئاکامی بۆردومانێکی ئیسرائیل بۆسەر خانوویەک لە گەڕەکی ڕیمال ڕۆژئاوای شاری غەززە، ھەشت فەڵەستینی کوژران.