بەرزبوونەوەی ژمارەی بریندارانی ئاگر كەوتنەوەکەی قاهیرە

بەپێی دوایین زانیاریی، لە كاتژمێرەكانی بەیانی ئەمڕۆ، ئاگرێكی گەورە لە ناو بازاڕێكی بازرگانی لە ناوەڕاستی شاری قاهیرەی پایتەختی میسر كەوتەوە و بەپێی دواین ئامار 45 كەس بەهۆی ئەو ئاگر کەوتنەوەیە بریندار بوونە و ئاگرەكەش لەلایەن هێزەكانی پاراستنی شارەكە كۆنترۆڵ كرا كوژێندرایەوە.

لە بەیاننامەیەكدا كە دەستەی فریاكەوتنی حكوومی بڵاویكردووەتەوە و وێنەیەكی ئاژانسی ئانادۆڵو وەریگرتووە ئاماژە بەوەكراوە، ژمارەی برینداربووانی ئەو ئاگرە كە لە بازاڕێكی بازرگانی لە ناوچەی عەتبە لە شاری قاهیرە بەیانی ئەمڕۆ كەوتەوە، گەیشتە 45 بریندار، كە بەهۆی سەختی برینەكانیانەوە 24 لەو بریندارانە رەوانەی نەخۆشخانەکان كران.

پێشتر گوتەبێژ بەناو وەزارەتی تەندروستی میسر خالید موجاهید لە لێدوانێكی رۆژنامەوانیدا رایگەیاندبوو، كە ئاماری قوربانیانی ئاگركەوتنەوەكە 20 بریندارە بەڵام دوای ئەو لێدوانە ژمارەی بریندارەكان بۆ 45 بریندار بەرزبووەوە.

هاوكات بەپێی بەیاننامەیەكی وەزارەتی ناوخۆی میسر، هێزەكانی پاراستنی شاری قاهیرە توانیویانە ئاگرەكە كۆنترۆڵ بکەن و بیكوژێننەوە.

ناوچەی عەتبە كە بە ناوچەیەكی بازرگانی لە شاری قاهیرە دادەنرێت، رۆژی سێشەممەی رابردوو ئاگرێكی گەورەی لێكەوتەوە بێ‌ ئەوەی هیچ زیانی گیانی بەدواوە بێت.