بەرپرسێکی ئێران: "ئەگەری ھەیە حزبوڵڵای لوبنان سنووری ھێرشەکەی بۆسەر ئیسرائیل بگۆڕێت"

ئەنقەرە ــ AA

گوتەبێژی نوێنەرایەتی ھەمیشەیی ئێران لە نەتەوە یەکگرتووەکان ڕایگەیاند کە ئەگەری ھەیە حزبوڵڵای لوبنان سنووری ھێرشەکەی بۆسەر ئیسرائیل بگۆڕێت.

گوتەبێژەکە لە لێدوانێکدا بۆ تۆڕی "CBS"ی ئەمریکی، گوتوویەتی: "تا ئێستا، حزبوڵڵای لوبنان لە ھێرشەکانی بۆسەر ئیسرائیل بەشێوەیەکی سنووردار پابەندبووە و لە ھێرشەکانیدا زیاتر بنکە سەربازییەکانی ئیسرائیل دەکاتە ئامانج".

ھەروەھا گوتەبێژەکە کە لەلایەن تۆڕی "CBS"وە ناوی نەھێنراوە باسی لەوەش کردووە کە ئەگەری ھەیە، حزبوڵڵای لوبنان ھێرشی فراوانتر و قووڵتر بۆسەر ئامانجەکانی ئیسرائیل ئەنجام بدات.

ئاماژەی بەوەشداوە، چاوەڕوان دەکەن کە حزبوڵڵای لوبنان سنووری ھێرشەکەی بۆسەر ئیسرائیل بگۆڕێت و گوتوویەتی: "چاوەڕان دەکەین لەمەودا، لە ھێرشەکانی حزبوڵڵای لوبنان، تەنھا بۆسەر ئامانجە سەربازییەکانی ئیسرائیل سنووردار نەبن".