دۆناڵد ترەمپ سەپاندنی باجی گومرگیی بەسەر چەندین وڵاتدا ڕاگەیاند

واشنتۆن ــ AA

سەرۆکی ئەمریکا، دۆناڵد ترەمپ سەپاندنی باجی گومرگیی بەسەر چەندین وڵاتی جیهاندا، ڕاگەیاند کە کەمترینیان بەڕێژەی لە سەدا ١٠ دەبێت.

دۆناڵد ترەمپ لە میانی چالاکییەکدا لە کۆشکی سپی، فەرمانێکی سەرۆکایەتی واژوو کرد کە تایبەتە بە سەپاندنی باجی گومرگیی بەسەر چەندین وڵاتی جیهاندا.

سەرۆکی ئەمریکا لە گوتارێکدا کە لە میانی چالاکییەکەدا پێشکەشی کرد، ڕایگەیاند، ئەمڕۆ "ڕۆژی ڕزگارکردنی ئەمریکایە" کە ماوەیەکی زۆربوو چاوەڕوانی بوون و گوتی: "وڵاتەکەمان و باجدەران زیاتر لە ٥٠ ساڵە دەچەوسێنرێنەوە، بەڵام چی دیکە ڕێگا بەوە نادەین".

ئاماژەی بەوەشدا کە ئەمڕۆ، یەکێک لەو ڕۆژە گرنگەکان لە مێژووی ئەمریکا، چونکە بە ڕاگەیاندنی سەربەخۆیی بۆ ئابووریی ئەمریکا دادەندرێت.

دۆناڵد ترەمپ جەختی لەوەش کردەوە کە کار دەکەن بۆ لابردنی بەربەستەکانی بەردەم بارزگانی دەرکی و گوتی: "لە کۆتاییدا، ئەمە دەبێتە مایەی بەرزبوونەوەی ئاستی بەرھەمھێنانی ناوخۆیی و دابەزینی نرخی بەرھەمەکان بۆ بەکاربەران".

ھەروەھا ڕاشیگەیاند کە لە ٤ی ئەم مانگەوە، ئەمریکا سەپاندنی باجی گومرگیی بەسەر وڵاتاندا جێبەجێ دەکات کە کەمترینیان بەڕێژەی لە سەدا ١٠ دەبێت.

سەرۆکی ئەمریکا، دۆناڵد ترەمپ باجی گومرگیی بەڕێژەی لە سەدا ٣٤ بەسەر چین، لە سەدا ٢٠ بەسەر یەکێتیی ئەورووپا، لە سەدا ٤٦ بەسەر ڤێتنام، لە سەدا ٣٢ بەسەر تایوان، لە سەدا ٢٤ بەسەر ژاپۆن، لە سەدا ٢٦ بەسەر ھیندستان و لە سەدا ١٠ بەسەر تورکیادا سەپاندووە.