دۆناڵد ترەمپ واشنتۆنى جێهێشت

واشنتۆن - AA

سەرۆکی ئەمریکا، دۆناڵد ترەمپ کە ئەمڕۆ ماوەی سەرۆکایەتییەکەی کۆتایی پێدێت، واشنتۆنی پایتەختی بەرەو فلۆریدا بەجێھێشت.

ترەمپ دوای ئەوە کە گەیشتە بنکەی ئاسمانیی ئاندریوز، گوتارێکی کورتی پێشکەش کرد.

ترەمپ گوتی "شانازییەکی گەوروە بوو بۆمن کە سەرۆکی ئێوە بووم، ھەموو کات بەرەنگاربوونەوە دەکەم بۆ ئێوە" و سوپاسی جێگری سەرۆک مایک پێنس و سەرجەم ئەوانەی کە لە ئیدارەکەیدا ئەرکیان وەرگرتووە و کۆنگرێسی ئەمریکای کرد.

دۆناڵد ترمپ بەبێ ناوھێنانی جۆ بایدن کە دوای چەند کاتژمێرێک دەبێتە ٤٦ھەمین سەرۆکی ئەمریکا، ھیوای سەرکەوتنی بۆ خواست و گوتی، "ھیوای بەختێکی باش و سەرکەوتن بۆ ئیدارەی نوێ دەخوازم. پێموایە زۆر سەرکەوتوو دەبن".

ترەمپ لە دوای ئەوەی گوتی "بەشێوازێکی دیکە دەگەڕێمەوە"، لەگەڵ میلانیا ترەمپ-ی ھاوسەری بە فڕۆکەی ئایرفۆرس وەن-ی تایبەت بە سەرۆکی ئەمریکا واشنتۆنی جێھێشت.