فڕۆکەیەک بە ٧٢ سەرنشینەوە لە نیپال کەوتە خوارەوە

پەکین - AA

فڕۆکەیەک بە ٦٨ سەرنشین و چوار کارمەندەوە لە ناوچەی پۆخارا ناوەڕاستی نیپال کەوتە خوارەوە.

رۆژنامەی کاتماندۆ پۆست بڵاوی کردەوە، فڕۆکەیەکی نەفەرهەڵگر لە جۆری "ATR 72"ی سەربە هێڵی ئاسمانیی "Yeti" کە لە کاتماندۆ-ی پایتەختەوە بەرەو ناوچەی پۆخارا فڕی بوو لە نزیک دۆڵی رووباری سێتی کەوتووەتە خوارەوە.

گوتەبێژی هێڵی ئاسمانیی "Yeti"، سودارشان بارتاولا رایگەیاند، فڕۆکەکە ٦٨ سەرنشین و چوار کارمەندی هەڵگرتووە.

سودارشان بارتاولا ئەوەیشی خستەڕوو کە ١٠ لە سەرنشینان هاووڵاتیی بیانین و دوو منداڵی ساوا لەنێو سەرنشینەکاندا بوون.

سەرۆکوەزیرانی نیپال، پوشپا کەمال دەهال داوای لە هێزە ئەمنییەکان و خەڵک کرد، پاڵپشتی هەوڵەکانی رزگارکردن بکەن لە ناوچەکەدا.

لەو گرتە ڤیدیۆییەدا کە کەناڵی فەرمی نیپال بڵاوی کردووەتەوە، دەردەکەوێت بڵێسە و دوکەڵ لە فڕۆکەکە دەردەچێت کە لە دامێنی چیای هیمالایا کەوتووەتە خوارەوە.

ئاماژە بەوەش کراوە، تەرمی ژمارەیەک لە سەرنشینەکان لە شوێنی رووداوەکە دۆزراونەتەوە.