مزاحم حوێت: "مانه‌وه‌ی هێزه‌كانی ئه‌مریكا له‌ عێراق پێویسته‌"

ھەولێر - AA

گوته‌بێژ به‌ناوی هۆزه‌كانی نه‌ینه‌وا، شێخ مزاحم حوێت رایگەیاند "چەند رۆژێک لەمەوبەر لەگەڵ ژمارەیەک لە سەرکردە سەربازیییەکان ئەمریکا کۆبووینەوە و باسمان لە مانەوەی ھێزەکانی ئەمریکا لە عێراق کرد".

شێخ مزاحم حوێت لە لێدوانێکی بۆ ئاژانسی ئانادۆڵو گوتی: "لەگەڵ چەند سەرکردەیەکی سەربازیی پلە باڵای ئەمریکی کۆبووینەوە و بۆچوونی خۆمان لەسەر ھێزەکانی ئەمریکا لە عێراق پێڕاگەیاندن کە ئێمە پێمان وایە بوونی ئەوان لەم قۆناغەدا پێویستە و ئەو ھێزانەشی باس لە چوونە دەرەوەی ئەوان دەکەن ئەو ھێزانەن کە لە ئێرانەوە نزیکن".

سەبارەت بەبوونی پڕۆژە یاسایەک بۆ رێکخستنەوەی بوونی سەربازیی بیانی لە عێراق حوێت گوتی: "ئەگەری ھەیە لە ئایندەدا ئەو پڕۆژە یاسایە بچێتە پەرلەمانی عێراق، بەڵام ئێمە بوونی ئەمریکییەکان بە گرنگ و پێویست دەزانین و ھەوڵ دەدەین لە رێگەی ھێزە سوننییەکان و ئەو ھێزە شیعانەشی کە تێڕوانینی پۆزەتیڤییان لەسەر ئەم بابەتە ھەیە رێگریی لەو پڕۆژە یاسایە بکەین و دەنگی پێنەدرێت".

حوێت لەدرێژەی قسەکانیدا ئاماژەی بۆ ئەوەشکرد کە ئەوان بە ئەمریکییەکانیان گوتووە سەرباری ئەوەی لە رابردوودا و لە چەند ناوچەیەکی عێراق وەکو فەلـلوجە ئەمریکا ھەڵەی گەورەی کردووە، بەڵام گرنگە ھەڵەکانی خۆیان چاک بکەنەوە بۆ ئەوەی خەڵکی زیاتر پشتگیری لە بوونی ئەوان لە عێراق بکات.

گوتەبێژ بەناوی ھۆزەکانی نەینەوا لەدرێژەی قسەکانیدا ھێمای بۆ ئەوەشکرد کە لەنێو پەرلەمانی عێراق و لەدەرەوەشیدا چەندین ھێزی شیعە ھەن کە لەگەڵ مانەوەی ھێزەکانی ئەمریکان لە عێراق و گوتی: "راستە ھەندێک لایەن ھەن دەیانەوێت عێراق بەدەستی ئێرانەوە بێت و ھیچ ھێزێکی ئەمریکی لە عێراق نەبێت، بەڵام لەئێستادا ئەمە رەتدەکەینەوە، چونکە ھێشتا ناوچە سوننە نشینەکان زۆر پێویستییان بە مانەوەی ئەمریکییەکان ھەیە و ئەوان تاڕادەیەک گەرەنتییەکی باشن، ئەوە جگە لەوەی ھێشتا ھەڕەشەی داعش لەسەر عێراق ماوە".

ئەو ھەروەھا رایگەیاند کە ھێشتا ئێران دەیەوێت دەستوەردانی زیاتر لە عێراق بکات و گوتی: "ئێران لە رێگەی گرووپە چەکدارەکانەوە کە پاڵپشتیی دارایی و چەکیشیان دەکات، لەوێشەوە پاڵپشتیی ھێزە سیاسییەکانییان لەنێو پەرلەمانی عێراق دەکات دەیەوێت ھێزەکانی ئەمریکا لە عێراق بکاتە دەرەوە و ئەمەش بە کارێکی ئەستەم دەزانیین لەم کاتانەدا".