مەسرور بارزانی بەرەو ئەورووپا بەڕێکەوت

هەولێر - AA

سەرۆکی حکوومەتی هەرێمی کوردستان، مەسرور بارزانی بە سەردانێکی فەرمی بەرەو ئەورووپا بەڕێکەوت.

بەپێی راگەیەندراوێکی نووسینگەی راگەیاندنی سەرۆکی حکوومەتی هەرێمی کوردستان، مەسرور بارزانی لە گەشتەکەیدا سەردانی چەند وڵاتێکی ئەورووپی دەکات و لەگەڵ بەرپرسانی ئەو وڵاتانەدا کۆدەبێتەوە.

بەگوێرەی راگەیەنراوەکە، مەسرور بارزانی لە کۆبوونەوەکانیدا گفتوگۆ دەربارەی پەرەپێدانی پەیوەندییە دیپلوماسییەکانی نێوان هەرێمی کوردستان و وڵاتانی ئەورووپا بەتایبەت لە بواری ئابووریدا دەکات.

لە راگەیەنراوەکەدا هیچ ئاماژەیەک بە ناوی ئەو وڵاتانە نەکراوە کە ئامانجی سەردانەکەی سەرۆکوەزیرانە و تێدا هاتووە: "حکوومەتی هەرێمی کوردستان هەوڵ دەدات سوود لە شارەزایی و تواناکانی وڵاتانی ئەورووپا وەربگرێت بۆ پەرەپێدانی دۆخی ئابووریی و گەشەپێدانی وەبەرهێنان و بەهێزکردنی ژێرخانی ئابووریی هەرێمی کوردستان".