كۆنگرەی رۆژنامەوانی گوتەبێژی فەرمی بزووتنەوەی گۆڕان

بە بۆنەی تێپەڕبوونی 100 رۆژ بەسەر رووداوەكانی 12ی تشرینی یەكەمی ساڵی 2015، گوتەبێژی فەرمی بزووتنەوەی گۆڕان شۆڕش حاجی كۆنگرەیەكی رۆژنامەوانی لە بارەگای سەرەكی حزبەكەی لە سلێمانی ساز كرد.
شۆڕش حاجی لەسەرەتای كۆنگرەكەدا لە بارەی دۆخی هەرێمەوە دوا و گوتی:"ئەمڕۆ گەلەكەمان بە هەلومەرجێكی دژوار و هەستیاردا تێپەڕ دەبێت ، كە لە دوای راپەڕین و كۆڕەوە جگە لە شەڕی ناوخۆ هیچ كات دۆخی هەرێم هێندەی ئێستا خراپ نەبووە، بۆ پێنج مانگ دەچێت مووچەی فەرمانبەران نەدراوە و پڕۆژە و كەسابەت لە بازاڕەكان وەستاوە و كەرتەكانی دیكەیش بەرەو خراپتر دەچن".
حاجی مكوڕبوونی حزبەكەی لەسەر كێشەی یاسایی سەرۆكایەتی لە رێگەی پڕۆژەی هەمواری یاسای سەرۆكایەتی هەرێم بۆ چەسپاندنی سیستمی پەرلەمانی لە هەرێمی كوردستان دووپاتكردەوە.
شۆڕش حاجی گوتی: "سوورین لەسەر ئەوەی دۆخەكە ناتەندروستە بۆ دانیشتن و گفتوگۆ لەگەڵ پارتی دیموكراتی كوردستان. تا ئەو كاتەی دۆخەكە ئاسایی نەكرێتەوە ئامادەی دانیشتن و گفتوگۆ نین".
گوتەبێژی بزووتنەوەی گۆڕان هەروەها رایگەیاند كە پشتیوانی تەواو لە داواكاری فەرمانبەران و مامۆستایان دەكەن و ئیدانەی بڕینی نیو مووچە و بڕینی دەرماڵەی فەرمانبەران دەكەن، هەروەها پشتیوانی لە شێوازی مەدەنیانە و ئاشتیانەی دەربڕینی ناڕەزایەتییەكانیان نیشان دا و ئەوەیشی بەباشترین رێگە چارە ناوبرد بۆ گەیشتن بە ئامانجەكان.
شۆڕش حاجی هەروەها گوتی: "دەسەڵات بەرپرسە لەهەر پێشهاتێك كە لەئایندەدا رووبدات ئەگەر بێت و بەدەنگ داواكانی خەڵكەوە نەچن و رێگاچارەیەك بۆ دەرچوون لەو قەیرانە داراییە نەدۆزنەوە".
لە وەڵامی دوو پرسیاری پەیامنێری ئاژانسی ئانادۆڵو لە بارەی مكوڕبوونی پارتی بۆ گۆڕینی دەستەی سەرۆكایەتی پەرلەمان و چارەسەركردنی ئەو كێشەیە، حاجی لە وەڵامدا گوتی: "پێمان وایە یوسف محەمەد سەرۆكی پەرلەمانە و بەدەنگدانی خەڵك و پەرلەمانتاران بووەتە سەرۆكی پەرلەمان و هیچ پێشێلكارییەكی یاسایی نەكردووە كە شایانی ئەوە بێت لە پۆستەكەی لاببرێت، هەركات هەموو لایەنە سیاسییەكان كۆك بوون لەسەر ئەوەی كە دەستەی سەرۆكایەتی ئێستای پەرلەمان بگۆڕن بەدەستەیەكی تر ئەوكات لە پەرلەمان دەنگدانی بۆ دەكرێت و ئێمەش ملكەچی بڕیاری پەرلەمان دەبین".
سەبارەت بە دیدوبۆچوونی حزبەكەشی بۆ پرسی ریفراندۆم و دەوڵەتی سەربەخۆیی كوردستان ، ئەو لە وەڵامدا گوتی: "لە بارەی ئەو دەنگۆیانەی باس لە سەربەخۆیی كوردستان و دەوڵەتی كوردی دەكات، پێمان وایە بەشێكی زۆری ئەو قسانە بۆ موزایەدەی حزبی و شەخسییە، وەك هەموو هاووڵاتییانی كوردستان پێمان وایە ئەگەر ئێستا ریفراندۆم بكرێت 99,9 لەسەدی خەڵكی كوردستان لەگەڵ دەوڵەتی سەربەخۆیە .
ئەگەر ئێمە جیاوازییەكمان هەبووبێت باسی بكەین ئەوەیە كە دەوڵەتی سەربەخۆی كوردستان دەبێت پێداویستییەكانی سەقامگیری ئەو دەوڵەتە دابین بكرێت لەوەی كە هێزی چەكداری نیشتمانی و ژێرخانی ئابووری و متمانە لە نێوان خەڵك و دەسەڵات و یەكڕیزی نیشتمانی و یەكدەنگی لەسەر بێت هەبێت، هەركەسیش رایگەیاند كە دەوڵەتی سەربەخۆ رادەگەیەنن ئێمە پشتیوانییان دەكەین و با ئەمڕۆ بێت و نەیخەنە سبەی".
لە بارەی گەڕانەوەی رێكخەری گشتیی حزبەكەی كە ماوەی چەند مانگێكە لە بەریتانیایە، حاجی گوتی: "هەر كات و ساتێك گەڕانەوەی نەوشیروان مستەفا بۆ بزووتنەوەی گۆڕان پێویست بێت و داوای گەڕانەوەی بكەین، راستەوخۆ دەگەڕێتەوە".