کۆبوونەوەی ئەنجوومەنی وەزیرانی ھەرێمی کوردستان

ھەولێر ـ AA

ئەمڕۆ چوارشەممە، ئەنجوومەنی وەزیرانی ھەرێمی کوردستان بە سەرپەرشتی سەرۆکی ئەنجوومەن، مەسرور بارزانی و ئامادەبوونی جێگری سەرۆکی ئەنجوومەن، قوباد تاڵەبانی کۆبووەوە.

بەگوێرەی راگەیەندراوی کۆبوونەوەکە، لە سەرەتای کۆبوونەوەکەدا، سەرۆکی ئەنجومەنی وەزیران ئاماژەی بەوەدا کە لە رۆژانی داھاتوودا و لە دوای کۆتاییھاتنی سەد رۆژی کارکردنی کابینەی نۆیەمی حکومەتی ھەرێمی کوردستان، راپۆرتێکی بەرفراوان بڵاو دەکرێتەوە و تێیدا بە وردەکارییەوە ئاماژە بەو کار و پڕۆژانە دەکرێت کە ئەنجام دراون و ئەوانەی نەتوانراوە ئەنجام بدرێن، لە گەڵ روونکردنەوەی ھۆکارەکانی ئەنجام نەدانیان. لەمبارەیەوە سەرۆکی ئەنجومەنی وەزیران گوتی، "حکومەت ھی خەڵکە و دەبێ لە خزمەتی خەڵکدا بێت و ھاووڵاتیان مافی خۆیانە بزانن حکومەت تا ئێستا چی کردووە".

دواتر سەرۆکی ئەنجومەنی وەزیران تیشکی خستە سەر گۆڕانکارییەکانی عێراق و ئاماژەی بەوەدا کە "ئێمە لەگەڵ داوا رەوا و یاسایییەکانی خەڵکی خۆپێشاندەری عێراقین، بەڵام بە ھیچ شێوەیەک لە گەڵ تووندوتیژیدا نین لە ھەر لایەکەوە بێت. پشتگیریش لە ھەنگاوە چاکسازییەکانی حکومەتی عێراق دەکەین بەڵام داواکارین ھاووڵاتیان بە شێوازێکی ئاشتیانە داواکارییەکانیان بخەنەڕوو و دامودەزگاکانی حکومەتی عێراقیش بەرپرسیارانە وەڵامی داخوازی ئاشتیخوازانەی خۆپێشاندەران بدەنەوە".

گوتیشی "سەقامگیربوونی بارودۆخی عێراق لە بەرژەوەندی ھەموو خەڵکی عێراقە بە ھەرێمی کوردستانیشەوە. ھەروەھا ھیوادارین کێشەکانی نێوان ھەرێمی کوردستان و حکوومەتی فیدرالی بە پێی دەستوور چارەسەربکرێن و بەغدا وەڵامێکی ئەرێنی پێشنیارەکانی حکوومەتی ھەرێمی کوردستان بداتەوە".

لە بارەی دۆخی سووریاش ، سەرۆکی ئەنجوومەنی وەزیران نیگەرانی خۆی لەگرژبوونی دۆخەکە نیشاندا و ئاماژەی بە لێکەوتە خراپەکانی بۆ سەر ھەرێمی کوردستان کرد کە تا ئێستا زیاتر لە ھەشت ھەزار پەنابەر بە ھۆی ئەم دۆخەوە روویان لە ھەرێمی کوردستان کردووە. روونیشیکردەوە کە حکوومەتی ھەرێمی کوردستان ھەرچی پێوست بێت بۆ ھاوکاریکردنیان ئەنجامی دەدات بەڵام پێویستی بە ھاوکاری حکومەتی فیدراڵی و کۆمەڵگەی نێودەوڵەتیشە کە لەمبارەیەوە یارمەتی حکوومەتی ھەرێمی کوردستان بدەن.

پاشان ئەنجومەنی وەزیران گفتوگۆی دەربارەی پێداچوونەوە بە پێکھاتەی کارگێڕی و دارایی وەزارەت و دەستە و لایەنەکانی نەبەستراو بە وەزارەت کرد بە رەچاوکردنی دۆخی ئێستا. بۆ ئەم مەبەستەش بڕیار درا ھەر وەزارەتێک لە لای خۆیەوە بە وردیی پیداچوونەوە بە پێکھاتەی وەزارەت و دامەزراوەکانی بکات بە پێی پلان وخشتەیەکی زەمەنی دیاریکراو بە ئاراستەی زیاتر بە دامەزراوەییکردن و کەمکردنەوەی خەرجییەکان ھەروەک لە ھێڵە گشتییەکانی کارنامەی کابینەی نۆیەمدا ھاتووە.

بڕگەیەکی دیکەی کۆبوونەوەکە، خستنەڕووی رەشنووسی پڕۆژەی لکاندنی منداڵ بە خێزانی جێگرەوە بوو کە لەلایەن وەزیری کار و کاروباری کۆمەڵایەتی،کوێستان محەمەد خرایە روو. لەمبارەیەوە ئەنجوومەنی وەزیران بڕیاریدا پڕۆژەکە بە شێوەیەکی مەبدەئی پەسەند بکات دوای ئەنجامدانی چەند گۆڕانکارییەک.

ئەنجوومەنی وەزیران ھەروەھا گفتوگۆی دەربارەی راپۆرتێکی فەرمـانگەی ھەمـاھەنگی و بەدواداچوون کرد بـۆ ڕێکخسـتنەوە و کـۆکردنەوە و ھەڵگرتنی ســــەرجەم ئەو دۆکیۆمێنت و ڕێککەوتننامە و یاداشتی لەیەکگەیشتنانەی کە لەکاتی سەردانی فەرمی شاندەکانی حکوومەتی ھەرێمی کوردستان بــــۆ دەرەوەی وڵات ئەنجام دراون، ئەمەش لە چوارچێوەی چاکسازییەکانی کابینەی نۆیەمی حکوومەتی ھەرێمی کوردستان کە تێێدا ھاتووە ئەنجامدانی ئیفاد و سەفەر و کۆنگرە و کۆنفرانس بە پێی پێویستی دەبێت.