رووداوێکی ھاتوچۆ لە پارێزگای بابل ٦٠ قوربانی لێکەوتەوە

هەولێر – AA

بەھۆی رووداوێکی ھاتوچۆ لە پارێزگای بابل، چوار کەس گیانیان لەدەستدا و ٥٦ کەسی دیکەیش برینداربوون.

سەرچاوەیەکی ئەمنی لە لێدوانێکدا بە میدیاکانی عێراقی راگەیاندووە، دوو پاسی نەفەرهەڵگر بە ژمارەیەک سەرنشینەوە لەسەر رێگای ناحیەی شوملی باشووری رۆژهەڵاتی شاری حلـلە سەنتەری پارێزگای بابل و ناحیەی نوعمانییە باکووری رۆژئاوای شاری کوت سەنتەری پارێزگای واست بەریەککەوتوون.

بەگوتەی سەرچاوەکە، بەهۆی رووداوەکەوە، چوار کەس گیانیان لەدەستداوە و ٥٦ کەسی دیکەیش برینداربوون.

سەرچاوەکە ئاماژەی بەوەیشداوە، ژماریەک لەو کەسانەی کە لە رووداوەکەدا بوونەتە قوربانی، هەڵگری رەگەزنامەی ئێرانین.