سەرکۆماری عێراق: "بەئامانجکردنی ھەولێر پێشھاتێکی مەترسیدارە"

ھەولێر ــ AA

سەرکۆماری عێراق، بەرھەم ئەحمەد ساڵح ئەو ھێرشە مووشەکییەی کە شەوی رابردوو کرایە سەر شاری ھەولێر بە کردەیەکی تیرۆریستی لەقەڵەمدا و رایگەیاند کە ئەنجامدانی ئەو ھێرشە، پێشھاتێکی مەترسیدارە.

بەرھەم ئەحمەد ساڵح سەبارەت بە ھێرشە مووشەکییەکەی شەوی رابردوو بۆسەر شاری ھەولێر، تویتێکی بڵاوکردەوە و تیایدا ئەوەی نووسیووە "ھێرشەکەی سەر شاری ھەولێر کە ژمارەیەک قوربانی لێکەوتەوە، پێشھاتێکی مەترسیدارە".

سەرکۆماری عێراق، بەرھەم ئەحمەد ساڵح راشیگەیاندووە "ھێرشەکە، کردەیەکی تیرۆریستییە بۆ بە ئامانجکردنی ھەوڵە نیشتمانییەکانی پاراستنی ئاسایشی وڵات و سەلامەتی ھاووڵاتییان، ھیچ بژاردەیەکی دیکەمان نییە، جگە لەوەی ھەوڵەکانمان زیاتر چڕبکەینەوە بۆ ریشەکێشکردنی تیرۆریستان و ئەو لایەنانەی کە ھەوڵدەدەن وڵات پەلکێشی گرژی و ئاڵۆزی بکەن".

بەرھەم ساڵح ھەورەھا نووسیوویەتی "دەوڵەت لەشەڕدایە دژبە تیرۆر و کەسانی دەرچوو لە یاسا".