سەرکۆماری عێراق پشتیوانی ھەڵبژاردنی پێشوەختە دەکات

بەغدا ـ AA

سەرکۆماری عێراق، بەرھەم ساڵح ئەمڕۆ پێنجشەممە، رایگەیاند کە پشتیوانی لە بەڕێوەچوونی ھەڵبژاردنی پێشوەختە لە وڵاتدا دەکات بۆ رەواندنەوەی ئەو قەیرانەی کە بەرۆکی وڵاتەکەی گرتووە و ماوەی مانگێکە خۆپیشاندان و ناڕەزایەتییەکان بەردەوامییان ھەیە، لەھەمانکاتدا داوای لێپرسینەوەی ئەو کەسانەی کرد کە بەرپرسن لە توندوتیژییەکان.

بەرھەم ساڵح لە گوتارێکیدا بۆ عێراقییەکان کە لە تەلەفزیۆنی فەڕمی عێراقییەوە پەخشکرا، ئاماژەی کرد بەوەی پەنابردن بۆ بەکارھێنانی ھێز و توندوتیژی لە رووبەڕووبوونەوەی خۆپیشاندەراندا بەھەموو شێوەیەک رەتکراوەیە، داواشی لە خۆپیشاندەران کرد لە پاراستنی ئەنجامدانی خۆپیشاندانەکان بەشێوەیەکی ئاشتیانە.

ئەو گوتی:" ئەوەی ئێستا پێویستە گرتنەبەری رێوشوێنی بەپەلەیە بۆ لێپرسینەوەی ئەوانەی بەرپرسن لە توندوتیژییەکان، پێویستە چەکیش تەنھا لەدەست دەوڵەتدا بێت".

بەرھەم ساڵح ھەروەھا گوتی:" وڵات ئارامی و سەقامگیری بەخۆوە نابینێ تا ئەوکاتەی چەک تەنھا بەدەست دەوڵەتەوە نەبێت".

سەرکۆماری عێراق ئاماژەی کرد بەوەی کە رەزامەندە لەسەر ئەنجامدانی ھەڵبژاردنی پێشوەختە لەسەر یاسای نوێی ھەڵبژاردن و کۆمیسیۆنێکی سەربەخۆی ھەڵبژاردنەکان.

ئەو گوتارەی سەرکۆمار، وەک ھەنگاوێکی لایەنە بەرپرسەکانی عێراق دێت بۆ دوورخستنەوەی وڵات لە دووبەرەکی و ناکۆکی و مەترسی کەوتنەوەی ئاژاوە لە وڵاتەکەدا، ئەوەش دوای بەردەوامی خۆپیشاندانەکان کە لەسەرەتای ئەم مانگەوە دەستی پێکردووە و بەو ھۆیەوە تائێستادا سەدان کوژراو و ھەزاران برینداری لێکەوتووەتەوە.