Arif Yusuf
25 تشرینی دووەم 2019•نوێکردنەوە: 26 تشرینی دووەم 2019
بەغدا - AA
كۆمیسیۆنی باڵای مافەكانی مرۆڤ لە عێراق رایگەیاند کە لە میانی چوار رۆژی رابردوودا بەهۆی پێكدادانی نێوان هێزە ئەمنییەكان و خۆپیشاندەرانەوە لە شاری بەغدا، ناسرییە و بەسرە ١١ خۆپیشاندەر كوژراون و ٢٨٩ی دیكەش برینداربوون.
كۆمیسیۆنی باڵای مافەكانی مرۆڤ لە عێراق لە راگەیەنراوێكدا، ئاماژەی بەوەكردووە كە لە میانی خۆپیشاندانەكاندا لە ماوەی نێوان ٢١ تا ٢٤ی ئەم مانگە بەهۆی پێكدادانەکانی هێزە ئەمنییەكان و خۆپیشاندەرانەوە، یەك خۆپیشاندەر لە بەغدا كوژراوە و ٦٨ی دیكەش برینداربوون، هەروەها حەوت خۆپیشاندەر لە ناسرییە كوژراون و ١٣١ی دیكەش برینداربوون و لە بەسرە-ش سێ خۆپیشاندەر كوژراون و ٩٠ی دیكەش برینداربوون.
بەپێی راگەیەندراوەكە هەر لەو ماوەیەدا، ٩٣ خۆپیشاندەر لە بەغدا دەستگیركراون كە ١٤یان ئازادكراون، ٣٨ خۆپیشاندەری دیكە لە بەسرە و ٢٢ی دیكەش لە ناسرییە و ٣٤ی دیكە لە كەربەلا دەستگیركراون و لەوبارەوە داوا لە هێزە ئەمنییەكان كراوە كە بەهیچ شێوەیەك بەبێ یاسا خۆپیشاندەران دەستگیر نەكەن و هەروەها داواش لە ئەنجوومەنی باڵای دادوەریی كراوە سەرجەم خۆپیشاندەرە دەستگیركراوەكان ئازاد بكات.
لە راگەیەندراوەكەدا هاتووە "كۆمیسیۆنی باڵای مافەكانی مرۆڤ دووبارە داوا لە حكوومەت دەكات لەوەی رێگە نەدات هێزە ئەمنییەكان توندوتیژی بەرامبەر بە خۆپیشاندەران بەكاربهێنن".
كۆمیسیۆنی باڵای مافەكانی مرۆڤ لە راگەیەندراوەكەدا جەختیكردووەتەوە لەسەر ئەوەی کە گرنگە هێزە ئەمنییەکان گیانی خۆپیشاندەران، هەروەها سامانی گشتی و تایبەت بپارێزرێن و ئاسانكاریش بكرێت بۆ دووبارە ئاساییكردنەوەی رەوشەكە و كردنەوەی دەرگای قوتابخانە و زانكۆكان و ئاشكرایشیكردووە، ژمارەیەک سكاڵای بەدەست گەیشتووە كە باس لە رفاندنی ژمارەیەك چالاكوان دەكەن، بۆیە داوای لە حكوومەت و هێزە ئەمنییەكان كردووە هەوڵەكانیان بە ئامانجی رزگاركردنی چالاكوانە رفێندراوەكان بخەنەگەڕ و تاوانبارانیش دەستگیر بكەن.
لە راگەیەندراوەكەدا تیشك خراوەتە سەر ئەوەی كە كۆمیسیۆنی باڵای مافەكانی مرۆڤ ئەوەشی بە بەڵگە كردووە كە لە ٢٢ی ئەم مانگەدا، ژمارەیەك كارمەندی فریاكەوتن لە نزیك باڵەخانەی بانكی ناوەندی لە شەقامی رەشید ناوەڕاستی بەغدا لە لایەن هێزە ئەمنییەكانەوە دوای هێرشكردنە سەریان دەستگیركراون و لەوبارەوە كۆمیسیۆنی ناوبراو داوای لە هێزە ئەمنییەكان كردووە كە گیانی تیمە خۆبەخشەكانی فریاكەوتن بپارێزن و رێگە نەدەن هێرشیان بكرێتە سەر.
