عێراق و ئەمریکا دۆسیەی نەوتی ھەرێمی کوردستانیان تاوتوێ کرد

ھەولێر ــ AA

وەزیری دەرەوەی عێراق، فوئاد حوسێن و ھەڵسوڕێنەری کاروباری باڵیۆزخانەی ئەمریکا لە بەغدا، ستیڤن ڤاگن پەیوەندییەکانی نێوان ھەردوو وڵات و دۆسیەی نەوتی ھەرێمی کوردستانیان تاوتوێ کرد.

وەزارەتی دەرەوەی عێراق لە ڕاگەیاندراوێکدا ئاماژەی بەوەداوە کە فوئاد حوسێن پێشوازی لە ستیڤن ڤاگن کردووە.

ڕاشیگەیاندووە لە دیدارەکەدا باس لە پەیوەندییەکانی نێوان ھەردوو وڵات کراوە، بەتایبەتیش ئەوەی کە پەیوەندی بە ڕۆڵی ئەو کۆمپانیا ئەمریکییانەوە ھەبوو کە لەبواری نەوتدا لە عێراق کار دەکەن.

باسی لەوەش کردووە کە ھەر لە میانی دیدارەکەدا، گفتوگۆکراوە لەبارەی چارەسەرکردنی کێشە ھەڵپەسێردراوەکانی ئەو کۆمپانیا نەوتییانەی کە لە ھەرێمی کوردستان کاردەکەن، بە شێوەیەک کە رێگە خۆش بکات بۆ دەستپێکردنەوەی ھەناردەکردنی نەوت لە کێڵگەکانی ھەرێمی کوردستانەوە.