پێشبینی دەکرێت سبەی بەفر و باران لە هەرێمی کوردستان ببارێت

هەولێر - AA

بەشی پێشبینیکردن لە بەڕێوەبەرایەتی گشتیی کەشناسی و بوومەلەرزەزانیی ھەرێمی کوردستان، هۆشداری دا لە ھاتنی بارستە ھەواییەکی ساردی جەمسەریی.

بەشی پێشبینیکردن لە بەڕێوەبەرایەتی گشتیی کەشناسی و بوومەلەرزەزانیی ھەرێمی کوردستان لە هەژماری خۆی لە تۆڕی کۆمەڵایەتیی فەیسبووک بڵاوی کردووەتەوە کە سبەی دووشەممە لە کاتەکانی بەیانی زوودا، کاریگەری بارستە ھەوایەکی ساردی جەمسەریی درێژدەبێیتەوە و باران و بەفر دەبارێت.

بەڕێوەبەرایەتی گشتیی کەشناسی و بوومەلەرزەزانیی ھەرێمی کوردستان ئەوەی خستووەتەڕوو کە لە سنووری پارێزگای ھەولێر ئاستی باران بارین مامناوەند دەبێت و لە سەنتەری پارێزگا ئەگەری نمەباران ھەیە و کاتی دابارین لە بەیانی زوو تا پێش نیوەڕۆ دەبێت.

ئاماژە بەوەیش کردووە کە لە ناوچە شاخاوییە بەرزەکان وەک زنجیرە چیای سەفین و زنجیرە چیاکانی سنووری ئیدارەی سۆران و تەواوی ناوچە شاخاوییە سنوورییەکان بەفر تا کاتەکانی دوای نیوەڕۆ دەبارێت.

ئەوەیشی راگەیاندووە کە لە سەنتەری سلێمانی نمەباران دەبارێت و لە ناوچە شاخاوییەکانی دەورووبەری ئەو پارێزگایە بەفر دەبارێت، تەواوی ناوچە شاخاوییەکانی ئیدارەی راپەڕین بەفربارین دەبێت.

ئەوەیشی خستووەتەڕوو کەلە سەنتەری پارێزگای دھۆک ئەگەری نمەباران ھەیە و لە بەشێک لە ناوچە شاخاوییەکانی رۆژھەڵاتی پارێزگاکە بەفر دەبارێت.

بەشی پێشبینیکردن لە بەڕێوەبەرایەتی گشتیی کەشناسی و بوومەلەرزەزانیی ھەرێمی کوردستان لەبارەی پارێزگای هەڵەبجەش باسی لەوە کردووە کە لە سنووری پارێزگای ھەڵەبجە باران و بەفر دەبارێت و لە دوای نیوەڕۆ، پلە بە پلە کاریگەری ئەو شەپۆلە لاواز دەبێت و لە شەودا کۆتای دێت، بەڵام پلەکانی گەرما ھەر بە نزمی دەمێنێتەوە.