Заев: Нема родова еднаквост сè додека жените трпат насилство

СКОПЈЕ (АА) - Претседателот на Владата на Република Македонија, Зоран Заев, денес учествуваше на настанот „По ратификацијата: Што е следно по Истанбулската конвенција“, во организација на канцеларијата на Обединетите нации во Република Македонија, при што истакна дека нема родова еднаквост и еднакви можности сè додека жените и девојките трпат насилство, јавува Anadolu Agency (AA).

Премиерот Зоран Заев во пресрет на Меѓународниот ден на жената 8-ми март, упати честитки и изрази почит кон сите активистки кои неуморно работат и се залагаат за родова еднаквост. Рече дека долгогодишната посветеност и борба на активистките резултираше со ратификацијата на конвенцијата на Советот на Европа за спречување и борба против насилството врз жените и борбата против насилството.

„Ве уверувам дека како претседател на Владата цврсто застанувам покрај Вас и со Вас бидејќи навистина нема родова еднаквост и еднакви можности сè додека жените и девојките трпат насилство. Во таа насока инсистирам и повикувам на координиран и искрен пристап на сите институции и сите министерства во справување со родовото насилство и во усвојувањето на потребните законски измени согласно обврските од конвенцијата“, рече Заев.

Премиерот на Република Македонија информираше дека веќе е формирано и Национално координативно тело против семејното насилство кое треба да прерасне и да се трансформира во национално координативно тело против родово засновано насилство.

„Со цел јакнење на заедничкиот пристап кон родовите прашања, со одлука на Владата ја формиравме интерресорската советодавно-консултативна група за еднакви можности на жените и мажите“, додаде Заев.

На крајот, повика на секојдневно дејствување против родовите стереотипи и еднакви можности за сите граѓани без разлика на полот.

Министерката за труд и социјална политика, Мила Царовска, информираше за предвидените активности кои се однесуваат на она што треба да се направи откако Република Македонија ја ратификуваше Истанбулската конвенција за превенција и борба и против семејното насилство.

Таа се осврна на важноста на глобалното движење „Сега кажувам“, за коешто рече дека жените гласно проговорија за насилството коешто го трпеле во текот на нивниот живот.

„Храброста и пркосот на жените биле и се движечка сила за прогресот на општеството, секогаш и секаде. Сега кажувам дека родовата еднаквност не е само прашање на фундаментални човекови права, туку е основа за просперитет и одржлив развој на нашата држава и на сите држави во светот“, рече Царовска.

Во однос на она што треба да се направи, министерката Царовска истакна дека е важно да постојат 25 засолништа за жртви на насилство, најмалку пет кризни центри за жртви на силување и најмалку три центри за жртви на сексуално насилство, како и повеќе од 20 советувалишни центри за кризни интервенции.

Министерот за здравство на Република Македонија, Венко Филипче, рече дека на катедрата за семејна медицина на Медицинскиот факултет во Скопје, од минатата година, се обучени 60 здравствени работици, како и дека во наредниот период здравствените работници ќе добијат и специјализирани обуки на тема насилство врз жени и клинички менаџмет на силување.

„Министерството за здравство како еден од клучните чинители во оваа сфера подготвува и протокол за обезбедување сеопфатен третман и нега при сексуално насилство. Во исто време, сакам да истакнам дека Министерството за здравство, во соработка со УНДП и со УНГБ, интензивно работи на воспоставување три центри за упатување на жртвите од сексуално насилство, согласно Истанбулската конвенција“, рече Филипче.

Министерот Филипче информираше дека центрите ќе се отворат на Клиниката за гинекологија, во болницата во Куманово и болницата во Тетово.

На настанот се обрати и Луиза Винтон, постојаната координаторка на ОН и претставничка на УНДП во Македонија, која искажа поддршка на активностите на институциите и сите општествени чинители кои работат на полето на унапредување на правата на жените.