Косовската Влада, предводена од Албин Курти, пристигна во Скопје

СКОПЈЕ (АА) – Владината делегација, предводена од претседателот на Владата на Република Северна Македонија, Зоран Заев, со официјална церемонија ја пречека делегацијата од Република Косово, предводена од претседателот на Владата, Албин Курти, јавува Агенција Анадолија (АА).

Владите на Република Северна Македонија и Република Косово, во полн состав, денеска ја остваруваат првата заедничка седница, која е во план да се одржи веднаш по средбите на премиерите и министрите.

Свечениот пречек се одржа пред Владата на Северна Македонија, во присуство на почесната гарда на Армијата на Република Северна Македонија и Воениот оркестар, кој ги интонира химните на двете држави.

На заедничката седница е предвидено свечено потпишување на повеќе меморандуми и договори за соработка.

Пред заедничката седница на двете влади, ќе следува тет-а-тет средба на премиерите Заев и Курти, како и билатерални средби на министрите во владите на двете земји.

Во рамките на овој настан, премиерите Зоран Заев и Албин Курти ќе одржат и заедничка прес-конференција.