Zylfije Adem Jakupi
31 Јануари 2024•Ажурирај: 01 Февруари 2024
ПРИШТИНА (АА) - Специјалниот претставник на Европската Унија за дијалогот меѓу Белград и Приштина, Мирослав Лајчак, по состанокот со косовскиот премиер Албин Курти и неговиот заменик Бесник Бислими, изјави дека има мал напредок во долгорочниот план за нормализирање на односите меѓу Косово и Србија, јавува Анадолу.
Лајчак во обраќањето до медиумите пред Владата рече дека благодарение на дијалогот на крајот на минатата година имало важни резултати, како што е енергетскиот договор и признавањето на регистарските таблички. Меѓутоа, додаде дека има мал напредок во поширокиот поглед на процесот за нормализирање на односите.
„Постигнавме мал напредок во нашиот долгорочен план за нормализација на односите меѓу Косово и Србија. Имаме договор од февруари и март минатата година, што значи дека не треба да се прашуваме што треба да се направи, не треба ни да се прашуваме како да го направиме тоа, прашањето е кога да го направиме тоа. И нормално, ако ме прашате мене, сметам дека имплементацијата на овој договор треба да започне што е можно поскоро“, рече Лајчак.
Тој истакна дека посетата на Приштина и претходно посетата на Белград биле со цел да се разговара за процесот на нормализација на односите и колку може да се постигне пред европските избори годинава.
Одговарајќи на прашањата на новинарите, Лајчак рече дека за вооружениот напад во Бањска на 24 септември се разговара на секоја средба, и дека за тоа се разговарало и при посетата на Белград. Истакна дека се очекува напаѓачите да одговараат, но нагласи дека истрагата не ја води ЕУ, туку земјите поединечно.
Запрашан дали на состанокот се разговарало за одлуката на Централната банка на Косово од 1 февруари да ја забрани употребата на српскиот динар во платниот промет во Косово, специјалниот претставник на ЕУ, Лајчак, рече дека денес ќе има повеќе информации за тоа прашање.
Европската Унија и Соединетите Американски Држави претходно побараа од косовските власти да ја одложат примената на одлуката за употреба само на валутата евро во Косово, за да може решението за ова прашање да се постигне во рамките на дијалогот меѓу Белград и Приштина.
Лајчак во Приштина се сретна и со претседателката на Косово, Вјоса Османи.
