Медиуми: Училиште во Сребреница им се заканувало на учениците со казни поради дресови на репрезентацијата на БиХ
- „Сребреница е место на геноцид, но не смее да биде место каде што децата се учат дека Босна и Херцеговина е непожелна“
Училиште во Сребреница наводно им се заканувало на учениците со санкции поради носење дресови на фудбалската репрезентација на Босна и Херцеговина, објави денес весникот „Дневни аваз“, пренесува Анадолу.
Според родителите, Јавната установа „Средношколски центар Сребреница“ наводно ги прогласила дресовите на репрезентацијата на Босна и Херцеговина за навредливи, а учениците биле предупредени дека може да се соочат со санкции, вклучително и намалување на оценката за поведение.
Сања Мочевиќ, директорка на Средношколскиот центар во Сребреница, во ентитетот Република Српска во Босна и Херцеговина, наводно им кажала на учениците во иднина да не доаѓаат во училиште облечени во дресови на националниот тим.
За случајот реагираше Мурат Тахировиќ, претседател на Здружението на жртви и сведоци на геноцидот, кој побара појаснување на одлуката.
„Доколку е точно дека ученичката во средношколскиот центар била укорена затоа што дошла во училиште во дрес на фудбалската репрезентација на Босна и Херцеговина и дека потоа учениците биле предупредени за санкции поради носење таков дрес, тогаш станува збор за постапка што е длабоко загрижувачка и неприфатлива“, рече тој.
Тахировиќ побара јавно објаснување на прописите врз чија основа дресот на националната репрезентација бил прогласен за неприфатлив.
Исто така, тој ги повика образовните власти во Република Српска и Босна и Херцеговина итно да го истражат случајот и да ги заштитат учениците од дискриминација и понижување.
„Сребреница е место на геноцид, но не смее да биде место каде што децата се учат дека Босна и Херцеговина е непожелна“, додаде Тахировиќ.
Во јули 1995 година силите на босанските Срби ја зазедоа Сребреница, која беше прогласена за безбедносна зона на ОН, при што убија 8.372 Бошњаци, мажи и момчиња, во злосторство што меѓународните судови, вклучително и Меѓународниот суд на правдата и Меѓународниот кривичен трибунал за поранешна Југославија, го признаа како геноцид.
