Премиерот Заев го прими лидерот на „Самоопределување“ од Косово, Албин Курти

СКОПЈЕ (АА) - Претседателот на Владата на Република Северна Македонија Зоран Заев го прими во посета претседателот на партијата „Самоопределување“ од Република Косово, Албин Курти, пренесува Anadolu Agency (AA).

Како што соопшти прес-службата на Владата на Северна Македонија, на средбата на која присуствуваа и пратениците Мухамед Зекири од Собранието на Република Северна Македонија и новоизбраните пратеници од Самоопределување во косовскиот парламент Фиторе Пацоли и Либурн Алиу, беа потврдени, како што се наведува, исклучително добрите односи меѓу двете земји и се разговараше за идната соработка која има силни потенцијали да ги зајакне билатералните врски во интерес на граѓаните на Северна Македонија и Косово.

„Во текот на разговорот на средбата како приоритети се издвоија проектите за инфраструктурно поврзување, меѓу кои, освен автопатот Скопје-Блаце, се издвоија како особено добредојдени патните поврзувања меѓу Тетово и Призрен, како и дооформувањето на капацитетите на граничниот премин Јажинце кои во голема мерка ќе ја олеснат комуникацијата на граѓаните и на бизнис иницијативите меѓу градовите од западниот дел на Северна Македонија и југозападниот регион на Косово", се вели во соопштението на Владата.

Се додава дека на средбата меѓу премиерот Заев и лидерот на партијата „Самоопределување“ од Косово, Курти, беше нагласено дека одржувањето на добрите односи и новите иницијативи за соработка меѓу двете земји, е од исклучително значење и за Западен Балкан и за секоја земја во регионот одделно од аспект на заедничките аспирации за членство во ЕУ.