Средба Вархеји - Османи: Мора да го задржиме импулсот и веднаш да започнеме со негово спроведување

ПРИШТИНА (АА) - Косово и Србија мора да ги спроведат сите договорени договори, изјави денеска еврокомесарот за проширување и соседство Оливер Вархеји, кој посетата на Косово ја започна со средба со претседателката Вјоса Османи, јавува Анадолу.

Во изјава за медиумите по средбата, комесарот Вархеји, говорејќи за дијалогот меѓу Косово и Србија, рече дека двете страни мора да ги спроведат договорените договори.

„Сметаме дека е постигнат напредок во изминатата година, сега е од суштинско значење двете страни да ги исполнат и спроведат своите обврски без одлагање, бидејќи мораме да го задржиме импулсот и веднаш да продолжиме со негова имплементација“, рече Вархеји.

Тој наведе дека е доволно да се цитираат заклучоците на Советот на ЕУ од февруари годинава, во кои се вели дека Советот апелира до двете страни целосно и безусловно да ги спроведат обврските што ги презеле во рамките на дијалогот, вклучително и договорите од 2013 и 2015 година за формирање Заедница на општини со српско мнозинство.

Вархеји рече дека разговарале за реформите и постигнувањата во последните шест години од стапувањето на сила на Договорот за стабилизација меѓу ЕУ и Косово. Тој истакна дека реформите мора да бидат континуирани и применливи.

Еврокомесарот ја поздрави и посветеноста на Владата на Косово за подобрување на судскиот систем во борбата против корупцијата.

Косовската претседателка Османи истакна дека посветеноста на Косово кон Европската Унија е непоколеблива и дека барањето за членство во Унијата е потврда за тоа.

„Република Косово во последните неколку месеци презеде решителни чекори за приближување на Косово до Европската Унија, како што споменав претходно, беше водена од волјата на нашиот народ и нашата определба за иднината и вредностите што нè обединуваат. Затоа, останувам со надеж дека ова животно определување ќе биде подеднакво проактивно од страна на нашите европски партнери и дека политиката на проширување ќе се гледа како единствена можност Европа да најде слобода и мир“, нагласи Османи.

Таа потсети и дека по, како што рече, долгите и нефер одложувања, од 1 јануари следната година, благодарение на визната либерализација, Косово ќе биде поблиску до ЕУ.

Комесарот Вархеји се сретна и со премиерот Албин Курти, а најавени се средби со претставници на опозицијата и граѓанското општество, како и посета на Северна Митровица.

За време на посетата на Косово, еврокомесарот ќе ја инаугурира „Програмата за внатрешни работи на ЕУ - Косово“ заедно со министерот за внатрешни работи на Косово, Џељаљ Свецла.

„Оваа програма на ЕУ, финансирана со 6,5 милиони евра, ќе се реализира во период од три години, со поддршка на Франција, Италија и Белгија. Ќе придонесе за зајакнување на капацитетите на косовските институции во борбата против организираниот криминал и корупцијата и ќе ја зајакне меѓународната соработка“, соопштија од Канцеларијата на ЕУ во Косово.