Хрватскиот претседател: Напредокот на Албанија не е проследен со соодветни реакции од ЕУ

ТИРАНА (АА) - Претседателот на Хрватска, Зоран Милановиќ, изјави дека напредокот на Албанија не е проследен со соодветни институционални реакции од Европската Унија (ЕУ), јавува Анадолу.

Милановиќ престојува во официјална посета на Албанија, а по средбата со претседателот Бајрам Бегај, беше одржана заедничка прес-конференција во Претседателството на Албанија, на која се фокусираа на односите меѓу двете земји, евроинтеграцискиот процес, неодамнешните тензии на северот на Косово и други прашања.

Претседателот Бегај истакна дека посетата на претседателот Милановиќ на Тирана доаѓа во клучен момент, особено за регионот на Западен Балкан, каде што, според него, Албанија и Хрватска активно придонесуваат и се важни фактори за мирот и стабилноста на регионот.

„Водевме долг и многу пријателски разговор, при што ја оценивме одличната политичка соработка и споделивме мислења за нови можности за билатерална соработка, со посебен осврт на економската соработка. Истакнав дека Хрватска останува модел што треба да го следиме на патот кон Европската Унија. Осврнувајќи се на процесот на проширување на Европската Унија со земјите од Западен Балкан, истакнав дека актуелните геополитички случувања веќе го направија овој процес стратегиска неопходност. Во овој контекст изразив уверување дека Хрватска ќе продолжи силно да го поддржува процесот на проширување“, истакна Бегај.

За неодамнешните тензии на северот на Косово, Бегај рече: „Ги осудивме драматичните настани на северот на Косово и терористичкиот и криминален напад врз полицијата во Бањска на 24 септември. На мојот пријател му ја изразив мојата загриженост за подготовките и тешкото воено вооружување што го користи терористичката група. Ја истакнав потребата од зголемување на притисокот од страна на Европската Унија за завршување на истрагите и за откривање на одговорностите, со директно влијание врз мирот и безбедноста на целиот регион. Ценам дека дијалогот е единствен начин да се постигне нормализација на односите меѓу двете држави и да се дојде до конечно признавање и нормално почитување на малцинствата според Уставот на Република Косово.“

Бегај, исто така, нагласи дека го запознал Милановиќ со проблемите со кои се соочува албанското малцинство во Прешевската Долина и додаде дека на средбите со меѓународните партнери секогаш го насочувал вниманието на правата на Албанците кои живеат во Прешевската Долина.

Хрватскиот претседател Милановиќ нагласи дека за повеќе од 20 години бил сведок на напредокот на Албанија во сите аспекти.

„За жал, овој напредок не беше проследен со соодветни институционални реакции од Европската Унија. Од НАТО да, но не и од ЕУ. Изгледа дека имаме проблем. Како што минува времето ми се чини дека пречките стануваат некако потешки, покомплицирани. За жал, многу малку работи се прават за да се промени ова и Албанија не знам што друго би можела да направи“, рече Милановиќ.

За неодамнешните тензии на северот на Косово, хрватскиот претседател изјави: „Пред две недели реков дека Србија и претседателот Вучиќ ни должат конкретни одговори. Одредени санкции против Србија и против граѓаните на Србија во целина ништо не би донеле. Нема санкции што би биле плодни“, истакна Милановиќ.

Запрашан за поставувањето на израелското знаме на зградата на хрватското МНР и ризикот од напади во Хрватска, мислејќи на неодамнешниот вооружен напад во Брисел, но и неодамнешниот конфликт на Блискиот Исток, Милановиќ рече: „Мора да сме свесни дека сите настани од ваков вид не се поврзани со настаните во Палестина. Кога станува збор за Палестина, јас сум за објективен и балансиран пристап. Дел од израелската администрација реагираше многу остро и, секако, правилата се исти за сите. Секако дека Исламската држава (ДЕАШ) е главна закана. Секако, оние што се сметаат за борци за слободата на Палестина може да се сметаат за нешто прифатливо. Сметаме дека сите правила се еднакви.“

„Имавме ритуално палење на Куранот во Шведска, што шведските власти го дозволија. Ова го сфаќам како шведска политичка култура, не знам што би правеле во овие случаи, би биле повнимателни од Швеѓаните. Мое мислење е дека треба да бидеме внимателни во Хрватска и да го зголемиме нивото на грижа“, додаде Милановиќ.

Хрватскиот претседател се сретна и со премиерот Еди Рама и други официјални претставници, а ќе одржи и поздравен говор во албанскиот Парламент.