„Старбакс“ бележи пад во продажбата трет квартал по ред

ИСТАНБУЛ (АА) – Американскиот синџир на кафетерии „Старбакс“ бележи пад во продажбата веќе трет квартал, покажува неговиот финансиски извештај, јавува Анадолу.

Глобалната продажба на „Старбакс“ е намалена за 7 отсто, се вели во извештајот.

Продажбата во Северна Америка е намалена за 6 отсто, во Кина за 14 отсто, а во меѓународните продавници бележи пад од 9 отсто, според извештајот.

Компанијата соопшти дека отворила 722 нето-нови кафетерии во четвртиот квартал од фискалната 2024 година, што одговара на периодот јули-септември оваа година, односно вкупно 40.199 кафетерии на глобално ниво.

„На крајот на четвртиот квартал кафетериите во САД и Кина сочинуваа 61 отсто од глобалното портфолио на компанијата, со 16.941 во САД и 7.596 во Кина“, се наведува во извештајот.

Според финансиските резултати, компанијата бележи намалување на приходите од 3 отсто на 6,69 милијарди долари од 6,9 милијарди долари на годишно ниво.

„Јасно е дека треба фундаментално да ја смениме нашата стратегија за да ги вратиме клиентите“, рече Брајан Никол, претседател и извршен директор на компанијата. „Имаме јасен план и брзо се движиме да го вратиме 'Старбакс' кон растот.“

Финансиската директорка Рејчел Руџери рече дека финансиските резултати не ја одразуваат силата на брендот „Старбакс“ и нагласи дека има доверба во способноста на компанијата да го сврти својот бизнис и да се врати на долгорочен раст.