Mücahithan Avcıoğlu
21 Јануари 2025•Ажурирај: 22 Јануари 2025
ИСТАНБУЛ (АА) - Петдневниот годишен состанок на Светскиот економски форум (СЕФ) во Швајцарија, познат и како Самит во Давос, започнува денес на тема „Соработка за интелигентна доба“, јавува Анадолу.
Годинашниот самит ќе има повеќе од 200 сесии што ќе се фокусираат на начините за зголемување на социјалната и економската отпорност, искористување на новите технологии и обновување на просперитетот.
На сесиите, говорниците ќе ги споделат своите оцени за политиките на идната администрација на Трамп на САД, поделби како резултат на постепеното слабеење на глобалната соработка, трговските политики, вештачката интелигенција и дигитализацијата, трансформацијата на чиста енергија, борбата против климатските промени, монетарните политики на централните банки и каматните стапки и инфлацијата.
Една од сесиите ќе се фокусира на актуелната состојба на економиите во Европа и начините за поттикнување економски раст без дополнителни даноци и долгови.
Во извештајот на СЕФ објавен денес се предлага четиристепено решение за кризата во европските економии. Овие решенија вклучуваат инвестирање во евтина и зелена енергија, обединување на европските капитални пазари преку предложена унија на капитални пазари, затворање на технолошкиот јаз со САД и постигнување рамнотежа помеѓу отворената трговија и стратегиската автономија.
Борге Бренде, претседател и извршен директор на форумот, нагласи дека оваа година самитот се одржува во услови на глобална несигурност предизвикана од геополитичките тензии, економска поделеност и забрзаните климатски промени. Тој додаде: „Во ова опкружување, иновативните и колаборативните пристапи се единствен начин за решавање на итните предизвици и откривање нови можности.“
Доналд Трамп, кој вчера беше инаугуриран за нов претседател на САД, ќе се вклучи во живо на самитот во четврток.
На самитот се очекува присуство на 60 шефови на држави и 1.600 претставници од глобалниот деловен свет, меѓу кои 900 високи извршни директори.
Според Извештајот за глобалните ризици на СЕФ, најголем ризик за светот оваа година се сметаат вооружените конфликти меѓу државите, а екстремните временски услови се издвојуваат како најважна долгорочна закана.
Во друг извештај на СЕФ се предупредува дека глобалната економија оваа година ќе биде под притисок поради растечката задолженост, политичката несигурност и расцепканост.
