Турско МНР: Неприфатливи се заканувачките пораки на САД

АНКАРА (АА) - Министерството за надворешни работи на Турција реагираше по заканите за санкции врз Турција кои денес ги упати американскиот претседател Доналд Трамп, доколку не биде ослободен американскиот свештеник Ендру Крег Брансон, на кого во Турција му се суди за шпионажа и делување во име на ПКК и ФЕТО, јавува Anadolu Agency (AA).

„Ја повикуваме администрацијата на Соединетите Американски Држави (САД) што побрзо да го остави настрана овој погрешен дискурс, и да се врати на конструктивниот дијалог“, се наведува во соопштението.

Портпаролот на Министерството за надворешни работи на Турција, Хами Аксој, истакна дека Турција е суверена земја со длабоко вкоренета демократска традиција и политички поредок кој го поддржува владеењето на законот.

„Никој не може да ѝ наредува на Турција и да ѝ се заканува на нашата земја. Реториката на закани кон Турција е неприфатлива“, додаде тој, напоменувајќи дека Турција искажала политичка волја и го направила својот дел заради подобрување на односите со САД.

„Невозможно е да се прифатат заканувачките пораки на американската администрација, која тотално го занемарува нашиот сојуз и пријателските односи“, истакна Аксој.

„Што се однесува до случајот Брансон, неопходните информации се доставени до нашите американски колеги во различни пригоди и јасно е изразено дека ова прашање во потополност е во надлежност на независното правосудство на Турција“, заклучува Аксој во соопштението.

Американскиот претседател, Доналд Трамп, упати закана до Турција дека ќе ѝ воведе опсежни санкции доколку не биде ослободен американскиот свештеник, Ендру Крег Брaнсон, на кого Турција му суди поради шпионажа и делување во име на ПКК и ФЕТО.

„САД на Турција ќе ѝ воведе опсежни санкции затоа што веќе долго во притвор го држи свештеникот Ендру Брaнсон, голем христијанин, татко и прекрасен човек. Овој невин верски поглавар веднаш мора да биде пуштен на слобода“, наведе Трамп на профилот на Твитер.

Иста закана до Турција упати и американскиот потпретседател Мајк Пенс.

„Доколку Турција не го ослободи веднаш свештеникот Брaнсон, и не го прати дома во Америка, САД ќе воведат значајни санкции сè додека овој невин верски поглавар не биде пуштен на слобода“, изјави Пенс.

На американскиот свештеник Ендру Крег Брaнсон, обвинет за шпионажа и активности во име на ПКК и ФЕТО, казната му е преиначена во домашен притвор.

Брaнсон беше уапсен кон крајот на 2016 година и оттогаш се наоѓа во притвор. Обвинет е за активности и шпионажа во корист на терористичките организации ПКК и ФЕТО.

На барање на Oбвинителството, судот во Измир на 18 јули му изрече мерка притвор на американскиот свештеник за време на судската постапка, но поради неговите здравствени проблеми таа мерка е преиначена во домашен притвор.

Во обвинението се наведува дека контактирал со членови на терористичката организација ФЕТО. Освен тоа, наведени се и неговите пораки дека му е жал што не успеал државниот удар во Турција, коj припадниците на ФЕТО се обидоа да го извршат на 15 јули 2016 година. На Брaнсон му се заканува затворска казна во траење од 35 години.