Кина инсталирала речиси 60 отсто од индустриските роботи во светот во 2025 година

Кина дополнително го зголемила својот удел на глобалниот пазар на индустриски роботи, со инсталирани речиси 60 отсто од сите единици во 2025 година, објавија државните медиуми, пренесува Анадолу.

Минатата година биле инсталирани вкупно 354.000 единици, што е речиси три од секои пет инсталации во светот и претставува нов рекорд, објави кинеската новинска агенција Синхуа, повикувајќи се на извештајот „Светска роботика 2026“.

„Успехот на Кина во модернизацијата на нејзиниот индустриски систем се темели врз националната стратегија за роботика што беше започната пред 10 години“, изјави Џејн Хефнер, претседателка на Меѓународната федерација за роботика.

Минатогодишните инсталации сочинувале 59 отсто од глобалната бројка, што е за 20 отсто повеќе од претходната година, според организацијата со седиште во Франкфурт.

Бројката била за речиси 60.000 единици поголема од претходниот годишен рекорд.

Побарувачката на Кина за индустриски роботи, главно, доаѓала од електричната и електронската индустрија, автомобилската индустрија и секторите за метали и машинерија.

Меѓународната федерација за роботика проценува дека кинескиот пазар на индустриски роботи е далеку од заситен, со просечен годишен раст од 5 до 10 отсто што се очекува до 2029 година.

Демографските промени и недостигот на работна сила што произлегува од нив се очекува и понатаму да ја поттикнуваат побарувачката за роботска автоматизација што може да помогне производството да стане поотпорно на недостигот на работници, соопшти федерацијата.

Водена од 15. Петгодишен план (2026–2030), кинеската стратегија за роботика става акцент на технолошката самостојност и модернизацијата на традиционалните индустрии.