Saadet Gökce
21 Февруари 2025•Ажурирај: 26 Февруари 2025
ИСТАНБУЛ (АА) – Кина лансира нов модел на вештачка интелигенција за побрзо и попрецизно дијагностицирање на ретки генетски болести, објавија државните медиуми, пренесува Анадолу.
Моделот наречен PUMCH-GENESIS има за цел да го олесни и забрза процесот на дијагностика, бидејќи доцнењето или погрешната дијагноза може да бидат одлучувачки за пациентите, јавува новинската агенција „Синхуа“.
Овој модел може брзо да открие можни ретки генетски болести или комплексни невроразвојни состојби, истовремено нудејќи медицински препораки, вклучувајќи специјализирани одделенија за консултации и потребни прегледи.
Во моментов, моделот овозможува прелиминарни консултации за дијагноза и закажување термини за пациентите. Следната фаза ќе се фокусира на медицинските аспекти, како што се генерирање на медицински белешки и интерпретација на генетски податоци.
Ова е прв модел на вештачка интелигенција за ретки болести кој е создаден врз основа на демографските карактеристики на Кина и е опремен со минимални почетни податоци од клиничката експертиза.
Моделот е развиен во соработка со Кинеската академија на науките и болницата „Пекинг јунион медикал колеџ“ (PUMCH) и моментално се наоѓа во фаза на тестирање.
Според новинската агенција, се очекува вештачката интелигенција во иднина да биде интегрирана во онлајн клиниката за мултидисциплинарни ретки болести на болницата.
