Јапонски истражувачи развија систем со вештачка интелигенција за откривање пластичен отпад во морето

Јапонските истражувачи развија систем со вештачка интелигенција за подобро откривање на пластичниот отпад во морето на морското дно, објавија локалните медиуми денес, јавува Анадолу.

Истражувачите од Јапонската агенција за морско-земјини науки и технологии развија систем наречен DeepLitterAI, кој може да обработува податоци со речиси двојно поголема брзина од луѓето, објави токиската новинска агенција Кјодо, повикувајќи се на списанието „Енвајорментал полушн“.

Се очекува системот да се користи за следење на пластичниот отпад во морето во реално време.

Истражувачите создадоа база на податоци со околу 12.000 снимки врз основа на снимки од морското дно направени од агенцијата од 1983 година. На снимките се наоѓале мали отпадоци, но и предмети што не се отпад, како камења и морски организми, кои лесно може да бидат погрешно идентификувани како отпад.

Тие го обучиле системот со користење различни обрасци, вклучително и заматување и инверзија на сликите, со цел да се намали бројот на погрешни детекции.

Иако голем дел од пластичниот отпад што завршува во морето потонува на морското дно, неговото прецизно откривање и понатаму е тешко.

„Можеме брзо да ги идентификуваме областите каде што се акумулираат големи количества отпад и да ги искористиме овие информации за спроведување мерки“, рече Рјота Накаџима, биолошки океанограф и член на истражувачкиот тим.

За време на тестирањата со вистински снимки, системот го идентификувал видот и количината на отпадот дури и кога предметите зафаќале само од 5 до 10 отсто од ширината на снимката.

Системот успешно открил 80 отсто од главните видови отпад, вклучително и пластични шишиња и полиетиленски кеси, додека разликата во однос на визуелните процени на експертите изнесувала околу 10 отсто.