Husamedin Gina
01 Март 2022•Ажурирај: 02 Март 2022
СКОПЈЕ (АА) – Министерот за надворешни работи на Северна Македонија, Бујар Османи, истакна дека првата одлука за да се спречи влошувањето и на ситуацијата во регионот е веднаш да се започнат преговорите со Северна Македонија и со Албанија за членство во Европската Унија (ЕУ), јавува Агенција Анадолија (АА).
Министерот Османи на редовниот неделен брифинг информираше за последните актуелности од надворешната политика и за тековните случувања во Украина, особено за граѓаните на Северна Македонија.
На брифингот Османи истакна дека поради можноста некој инвазијата на Русија во Украина да ја искористи за влошување на приликите на Балканот, степенот на внимателност е подигнат и во НАТО и во Европската Унија (ЕУ).
Одговарајќи на новинарско прашање колку се реални оценките кризата да се прелее на Балканот, Османи наведе дека до меѓународната заедница алармирале да посвети поголемо внимание на регионот, дека првиот чекор, ургентниот чекор што треба да се направи е веднаш да се деблокира почетокот на преговорите на Северна Македонија и Албанија со Европската Унија (ЕУ).
„Првата одлука за да се спречи влошувањето и на ситуацијата во регионот е веднаш, веднаш да се започнат преговорите со Северна Македонија и со Албанија“, нагласи Османи.
Истакнувајќи дека состојбата во Украина се влошува, тој рече дека обидите за преговори започнати вчера се прекинати заради дополнителни консултации.
„Меѓутоа, информациите којшто ние ги имаме се дека се очекува разгорување на воените дејствија во наредниот период со тоа што се отежнуваат околностите на терен, посебно создавањето на безбедни коридори за евакуација на нашите граѓани“, рече министерот Османи.
На брифингот, тој информираше дека од вкупно 100 мапирани граѓани на Северна Македонија во Украина, 50 се веќе извлечени и уште толку треба да се евакуираат, и дека се очекува поголем дел од нив денес да бидат евакуирани.
Османи, исто така, рече дека за евакуација на граѓаните контактирале и со Турција.
Министерот за надворешни работи додаде дека е одложено испраќањето на македонскиот амбасадор во Русија, кој требаше да биде испратен на 15 март.
