ЊУЈОРК (АА)
Претседателот на Туркије, Реџеп Таип Ердоган, синоќа рече дека Советот за безбедност на ОН повеќе не е гарант на светската сигурност, посочувајќи дека станал бојно поле за политички стратегии на пет земји. Во продолжение истакна дека глобално, сите нивоа на расизам, ксенофобија и исламофобија достигнале опасна точка на прекршување, известува Анадолу.
„Расизмот, ксенофобијата и исламофобијата, кои се шират како вирус, особено во развиените земји, достигнаа неподносливо ниво“, рече Ердоган во своето обраќање на 78. седница на Генералното собрание на Обединетите нации (ГСОН) во Њујорк.
Ердоган предупреди дека знаците на расизам, ксенофобија и исламофобија кои прераснуваат во нова криза, достигнале алармантни димензии минатата година.
Зборувајќи дека говорот на омраза, поларизацијата и дискриминацијата на недолжните луѓе ја навредуваат јавната свест во сите делови на светот, турскиот лидер рече дека популистичките политичари во многу земји и понатаму си играат со оган, поттикнувајќи ги овие опасни трендови.
„Менталитетот кој поттикнува гнасни напади на светата книга Куран, дозволувајќи ги под превезот на слободата на изразување, всушност ја затемнува сопствената иднина“, рече Ердоган.
Тој нагласи дека Туркије ќе продолжи да ја поддржува иницијативата за борба против исламофобијата на сите платформи, особено на платформите на ОН, Организацијата за европска безбедност и соработка (ОБСЕ) и Организацијата за исламска соработка (ОИС).
Ердоган ги повика светските лидери, за кои рече дека ги отфрлаат таквите напади на светите вредности, да ја поддржат борбата на Туркије.
Претседателот на Туркије во продолжение рече дека неговата земја очекува Европската Унија (ЕУ) да ги исполни своите долго запоставени обврски кон Анкара.
„Сѐ посложената природа на регионалните и глобалните предизвици укажува на тоа дека постои потреба, сега повеќе од кога било, да се унапредат односите на Туркије и Европската Унија врз здрава основа“, рече Ердоган.
Тој рече дека првенствено мора да се стави крај на амбивалентниот однос на ЕУ кон Турција.
Турскиот претседател ја предупреди меѓународната заедница на потенцијални последици во случај на каква било воена интервенција во Нигер, нагласувајќи го ризикот од подлабока нестабилност за таа нација и целиот регион Сахел.
Ердоган нагласи дека Сахел се соочува со сериозни политички, економски, социјални и безбедносни предизвици.
„Секоја воена интервенција во Нигер ризикува оваа земја и целиот регион да ги втурне во подлабока нестабилност. Се надеваме дека Нигер, кој минува низ тежок период на предизвици, што поскоро ќе воспостави уставен поредок и демократско раководство“, рече Ердоган.
Коментирајќи ги последните случувања во Карабах и азербејџанската антитерористичка операција, со цел воспоставување на уставниот поредок, Ердоган јасно порача дека Карабах е територија на Азербејџан, и наметнувањето на каков било друг статус на тој регион никогаш нема да биде прифатено.
„Ние уште од самиот почеток го поддржувавме процесот на преговори меѓу Азербејџан и Ерменија, меѓутоа, гледаме дека Ерменија во потполност не ја искористи оваа можност“ , истакна претседателот на Туркије.
Тој додаде дека Туркије очекува Ерменија да ги исполни своите обврски, особено оние што се однесуваат на отворањето на коридорот Занзегур, клучен за планираниот непречен пат низ ерменската територија, кој ги поврзува Азербејџан со енклавата Нахчиван.
Ердоган посочи дека сега примарна цел на територијата на Азербејџан би требало да биде мирен соживот на сите, вклучувајќи ги и Ерменците.
„Туркије ги поддржува чекорите на Азербејџан за сочувување на нејзиниот територијален интегритет“, рече Ердоган.
Поздравувајќи ја „новата агенда за мир“ на шефот на ОН, Гутереш, Ердоган рече дека Република Туркије започнала бројни иницијативи за јакнење на мирот и стабилноста.
„Советот за безбедност на ОН повеќе не е гарант на светската сигурност, туку стана бојно поле за политички стратегии на пет земји“, истакна Ердоган.
Претседателот на Туркије нагласи дека е неопходно брзо реструктурирање на институциите кои се под закрила на ОН, одговорни за воспоставување и заштита на безбедноста, мирот и благосостојбата на светот.
Ердоган рече и дека Туркије продолжува да ги јакне напорите за ставање крај на руско-украинската војна по дипломатски пат и дијалог, врз основа на суверенитетот и територијалниот интегритет на Украина.
Коментирајќи ја војната во Сирија и политичката безбедносна криза во Ирак, Ердоган порача дека Туркије ги почитува суверенитетот и интегритетот на сите соседи и нема аспирации врз која било територија.
„Најголема закана за интегритетот и политичкото единство на Сирија е поддршката која им се дава на терористичките организации поради интереси со таа земја“, рече Ердоган.
Зборувајќи за терористичките организации и поддршката што им се дава, Ердоган истакна:
„Разоткриени се игрите на оние кои се држат до изговорот за ДЕАШ секогаш кога немаат решение за нешто во регионот“, и додаде:
„Сакам отворено да зборувам како лидер на земја која всушност ја водеше најголемата борба против ДЕАШ, која ѝ нанесе најголеми загуби на оваа организација и многу добро ги знае фактите, зад и пред проблемот. Доста ни е од лицемерието на оние кои го користат ДЕАШ и сличните организации како параван за сопствените политички и економски интереси на Блискиот Исток, Северна Африка и Сахел, особено во Сирија и Ирак. ДЕАШ не е единствената закана во овие региони. Вистинската закана се терористичките организации, паравоените групи, платениците и некои локални елементи кои работат за тој што ќе понуди највисока цена. Тие се негуваат и зајакнуваат, за да се користат како алатки за прокси војни. И покрај оваа реалност, земјите кои продолжуваат да соработуваат со терористичките организации исклучиво за свои политички и економски интереси, немаат право да се жалат на тероризмот и проблемите поврзани со него.
Во ваков свет, никој не е безбеден, без разлика дали живее веднаш до зоната на конфликт или далеку на копно опкружено со океани. Затоа велиме, мораме брзо да ги реструктурираме институциите одговорни за осигурување на безбедноста, мирот и благосостојбата на светот, под водство на Обединетите нации. Мора да изградиме инфраструктура на глобално владеење која е способна да ги претставува сите потекла, верувања и култури во светот, со нивната географија и демографија. Како резултат на тоа, уште еднаш велиме од сѐ срце ‘Светот е поголем од 5, можен е поправеден свет’.“
За блискоисточниот конфликт меѓу Палестина и Израел рече дека траен мир на Блискиот Исток е можен само со конечно и мирно решение на проблемот меѓу двете држави.
„Без воспоставување на независна палестинска држава на нејзините територии во границите од 1967 година, тешко дека и Израел ќе може да го воспостави посакуваниот мир и безбедност“, посочи Ердоган.
Турскиот претседател порача и дека Туркије активно го поддржува процесот на дијалог меѓу Србија и Косово, како и дека ја поддржува изградбата на трајна стабилност на Балканот.
Ердоган на крајот на својот говор ја повика меѓународната заедница да ја признае независноста на Турската Република Северен Кипар и да воспостави дипломатски, политички и економски врски со неа.
