Русија ќе го затвори Генералниот конзулат на Полска во Санкт Петербург

Русија денес соопшти дека ќе го затвори Генералниот конзулат на Полска во Санкт Петербург како одговор на одлуката на Варшава во октомври да го затвори руското дипломатско претставништво во градот Познањ, јавува Анадолу.

Руското Министерство за надворешни работи соопшти дека испратило нота до полската страна во врска со потегот, информирајќи ја дека Москва „ќе ја повлече согласноста“ за работење на Конзулатот од 10 јануари 2025 година.

Во соопштението се наведува дека „водени од принципот на реципроцитет“, тројца дипломатски вработени во полскиот Конзулат се прогласени за „персона нон грата“ и мора да ја напуштат Русија пред наведениот датум.

Москва ги обвини полските власти дека отворено водат непријателска политика кон Русија во последните години, додавајќи дека една од манифестациите на таквиот пристап е затворањето на рускиот Генерален конзулат во Познањ.

„Полската страна е информирана дека Москва презела и ќе продолжи да презема остри контрамерки против сите непријателски потези кон Русија“, се додава во соопштението.

Полскиот министер за надворешни работи Радослав Сикорски на 22 октомври објави дека Варшава одлучила да го затвори рускиот Конзулат во Познањ и да протера дипломати поради наводни обиди за саботажа.