СКОПЈЕ (АА) - Министерот за надворешни работи на Северна Македонија, Бујар Османи, беше домаќин на министерката за Европа и Америка на Обединетото Кралство, Венди Мортон, со која претседаваше со првиот состанок на Советот за партнерство, трговија и соработка помеѓу двете држави, јавува Агенција Анадолија (AA).
Во рамките на состанокот на Советот, министрите потпишаа и Деловник за работа, кој е рамка преку која ќе се одвива целосната соработка во рамките на ова тело.
Османи ја истакна успешната политичка соработка меѓу двете земји, потсетувајќи дека тие се и сојузници во НАТО, додавајќи дека сега се отвораат нови можности и се создава безбедност за бизнисите.
Тој, исто така, рече дека Советот за партнерство, трговија и соработка меѓу Северна Македонија и Обединетото Кралство е прв од ваков вид во Европа.
„Денеска, институционално, административно и технички, не само што обезбедивме продолжување на општата билатерална соработка со Обединетото Кралство дури и по Брегзит, туку можам слободно да кажам дека денеска создаваме и нови потенцијали за бизнисите, потенцијали за нови инвестиции, но и можности за проширување на постојните капацитети во земјата“, рече Османи.
Потсетувајќи дека Северна Македонија е најголемиот трговски партнер на Обединетото Кралство на Западен Балкан, Мортон рече дека договорот обезбедува стабилност за бизнисите и потрошувачите, како и дека обезбедува важна рамка за политички дијалог меѓу двете земји.
„Утрово усвоивме сет деловнички правила за идните состаноци, поставувајќи ги меѓусебните надворешни политички цели и разговаравме за некои важни прашања од заеднички интерес, од трговијата, одбраната, миграцијата“, рече Мортон.
Советот за партнерство, трговија и соработка се смета за највисоко работно тело надлежно за имплементација на Спогодбата за партнерство, трговија и соработка, претходно потпишана меѓу двете земји.
