Gizem Nisa Çebi Demir
22 Декември 2025•Ажурирај: 22 Декември 2025
Турскиот министер за надворешни работи Хакан Фидан, министерот за национална одбрана Јашар Ѓулер и шефот на разузнавањето Ибрахим Калин денес се во работна посета на главниот град на Сирија, Дамаск, јавува Анадолу.
Фидан, Ѓулер и Калин се сретнаа со сирискиот претседател Ахмад ал-Шара и со други сириски претставници во рамките на посетата, според информациите добиени од извори во турското Министерство за надворешни работи.
На состаноците сеопфатно е проценета траекторијата на односите меѓу Турција и Сирија во текот на изминатата година, низ политички, економски и безбедносни димензии, по првата годишнина од соборувањето на режимот на Башар ал-Асад.
Дискусиите се фокусираа и на напредокот во спроведувањето на договорот од 10 март, кој е тесно поврзан со приоритетите за национална безбедност на Турција.
Се очекува во текот на посетата да се разгледаат и новите безбедносни ризици во Јужна Сирија што произлегуваат од агресивните дејства на Израел.
Во контекст на заедничките интереси на Турција и Сирија, како и неодамнешното пристапување на Сирија во Меѓународната коалиција за борба против ДЕАШ, дискутирано е и за соработката насочена кон спречување на повторното појавување на терористичката група ДЕАШ - која се стреми да ја искористи потенцијалната кревкост на сириска територија.
Покрај безбедносните прашања, кои се во фокусот на разговорите, на дневен ред беше и прегледот на билатералните проекти што се спроведуваат за обнова на Сирија и евалуација на напорите за поддршка на иницијативите на сириската Влада за градење капацитети.
Заменик-министерот за надворешни работи Нух Јилмаз, кој е назначен за амбасадор на Турција во Дамаск, исто така, е дел од делегацијата.
Во едногодишниот период по падот на режимот на Ал-Асад, односите меѓу Турција и Сирија добија интензитет во многу области, со појава на историски можности за билатерална и регионална соработка, особено во областите на безбедноста и економијата.
Иако ги поддржува напорите за заздравување на раните оставени од речиси 15-годишниот сириски конфликт, исто така, Турција работи на тоа да се обезбеди искористување на новите можности за соработка на начин што ќе служи на стабилноста и безбедноста на Сирија во согласност со интересите на двете земји.
Во овој контекст, Фидан ја оствари својата прва посета на Сирија по падот на режимот на Ал-Асад на 22 декември 2024 година.
- Заемни посети во формат 3+3
Во наредниот период, како резултат на позитивната атмосфера што се создаде во новата ера на Сирија, продолжуваат меѓусебните посети на високо ниво меѓу Турција и Сирија.
Во овие рамки состаноците што се одржуваат во формат 3+3 меѓу двете земји добија особено значење.
Според тоа, сирискиот министер за надворешни работи Асад Хасан ал-Шаибани ја посети Турција на 15 јануари, придружуван од делегација на високо ниво. За време на посетата, Фидан, Ѓулер и Калин се сретнаа со своите сириски колеги.
По таа средба турскиот министер за надворешни работи, министерот за национална одбрана и шефот на разузнавањето беа во работна посета на Сирија на 13 март.
Друг состанок фокусиран на безбедносната соработка и актуелните случувања меѓу двете земји се одржа во Анкара на 12 октомври, со учество на Фидан, Ѓулер, Калин и нивните сириски колеги.
