Шефот на холандската дипломатија во посета на Албанија

ТИРАНА (АА) - Министерот за надворешни работи на Холандија, Стеф Блок, во рамки на неговата посета на Албанија оствари средба со министерот за Европа и надворешни работи на Албанија, Дитмир Бушати, јавува Anadolu Agency (AA).

Блок и Бушати, по нивната средба организираа заедничка прес-конференција, на која се фокусираа на европската интеграција на Албанија и соработката меѓу двете земји.

Албанскиот министер Бушати нагласи дека мошне плодно е да се дискутира не само за билатералната соработка, туку и за процесот на реформите на Албанија во рамки на процесот за европската интеграција.

„Ние потполно веруваме дека во иднина ќе ја зајакнуваме соработката за понатамошно подобрување на имиџот на нашата земја, за подобро да се комуницира во одвивањето на реформите кои ги преземаме во Албанија и за јавноста во Холандија. За да соработуваме заедно на начин да ги исполнуваме сите обврски и сите реформи кои ќе овозможат започнување на преговорите за членството на Албанија во Европската Унија (ЕУ). За земјите како Албанија, Европа е идеал и еден проект за целиот спектар на реформи кои треба да ги преземе нашата земја“, истакна Бушати.

„Европската комисија го реализираше предлогот, Советот во јули определи јасен календар. Обврските се јасни, верувам дека е постигнат голем прогрес што се однесува до реформите во областа на владеењето на правото во економијата. Секој реформски процес се придружува, исто така со поголеми предизвици. Се надевам дека Европската комисија и земјите членки ќе покажат зелено светло за започнување на преговорите со Албанија“, додаде Бушати.

Шефот на холандската дипломатија, Блок, истакна дека Холандија е ангажирана и посветена на европската перспектива на Албанија и дека оваа земја направила големи чекори во повеќе области.

Тој рече дека двете земји имаат многу цврсти односи, и дека неговата земја секогаш била активен партнер на Албанија во повеќе области.

„Гледаме дека овие односи се зголемуваат. Владеењето на правото и демократијата остануваат централни вредности на Европската Унија и ние гледаме дека Владата на Албанија е силно посветена во оваа област и прави сериозни чекори. Албанија презеде серија реформи. Важно е да се зачува фокусот за другите дополнителни реформи за да се оди напред во поставувањето на една одржлива и неприкосновена историја за борба против организираниот криминал и другите важни области“, нагласи Блок.

Двајцата дипломати разговараа и за феноменот на емиграцијата на албанските граѓани и напорите на Албанија за спречување на овој феномен.

„Заедно со Албанија се бориме против овој феномен. Албанија направи големи чекори во бројни области, како реформи во правосудството, подобрување на климата на инвестициите и заштита на човековите права. Холандија продолжува да биде подготвена да ја поддржува Албанија на патот кон интеграцијата во Европската Унија, и оваа соработка ќе продолжи и во иднина“, додаде Блок.

- За холандската новинарка сме во близок контакт со Турција

Во врска со депортацијата на холандската новинарка од Турција, Блок рече: „Министерството за надворешни работи вчера беше во близок контакт со турското Министерство за надворешни работи. На новинарката ѝ понудивме наша помош, и продолжуваме да бидеме во близок контакт во врска со причините кои доведоа до депортација.“

Холандскиот министер ќе има средба и со претседателот на Албанија, Илир Мета, и со други функционери во земјата.