Данската разузнавачка служба: Русија подготвува саботажни напади врз одбранбената индустрија

Руските разузнавачки служби активно подготвуваат саботажни операции против компании од одбранбената индустрија во Данска, објави вчера јавниот радиодифузен сервис ДР, повикувајќи се на данската разузнавачка служба, јавува Анадолу.

„Гледаме дека и данските компании се цели на конкретни руски планови за саботажа и дека руските разузнавачки служби активно подготвуваат саботажни операции насочени кон одбранбената индустрија во Данска“, рече Емил Гресхолм, шеф на контраразузнавањето во Данската служба за безбедност и разузнавање (ПЕТ).

Гресхолм, исто така, за данскиот весник „Берлингске“ изјави дека властите откриле конкретни руски планови за саботажни операции против компании во Данска.

„Затоа ова не е само предупредување дека еден ден би можело да стигне до Данска. Веќе сега го гледаме планирањето. Многу конкретно“, рече тој.

Компаниите што би можело да бидат цел на нападите се фирми од одбранбената индустрија поврзани со воената помош за Украина, соопшти ПЕТ.

Разузнавачката служба наведе дека идентификувала „конкретни примери“ на обиди на Русија да регрутира обични Данци преку социјалните мрежи и други онлајн платформи.

Од овие лица би можело да се бара да извршуваат задачи, меѓу кои фотографирање компании или објекти, што би се користело за планирање саботажни операции, соопшти ПЕТ.

„Исклучително сериозно е доколку обични Данци им помагаат на руските разузнавачки служби – намерно или без да знаат“, рече Гресхолм.

ПЕТ соопшти дека тесно соработува со Данската одбранбено-разузнавачка служба и Данската агенција за социјална безбедност и подготвеност, како и дека редовно ги информира полициските области за процената на заканата.

„Континуирано информиравме избрани компании и индустриски организации за процената на заканата и, заедно со други институции, советувавме за конкретни безбедносни мерки“, рече Гресхолм.

Тој додаде дека одбранбената индустрија во целина треба да ги преземе „неопходните безбедносни мерки“ за да се заштити.

Гресхолм рече дека ПЕТ ја смета заканата за доволно конкретна за јавно да предупреди за неа.

„Станува збор за толку конкретно идентификување и подготвување што сметаме дека е неопходно да пратиме порака дека ова е закана што мора да се сфати сериозно“, рече тој.

Конфедерацијата на данската индустрија соопшти дека сериозно ја сфаќа процената на ПЕТ и дека е во близок контакт со надлежните институции.

„Променетата процена на заканата бара зголемено внимание од компаниите, но и смиреност и пропорционалност“, рече Расмус Андерскоув, шеф за безбедност и подготвеност во таа организација.

Андерскоув рече дека компаниите треба да ја проценат својата конкретна изложеност и да се осигурат дека нивните безбедносни мерки и мерките за итни ситуации функционираат правилно.

Флеминг Сплидсбол, виш истражувач во Данскиот институт за меѓународни студии, го оцени соопштението на ПЕТ како сериозно и рече дека заканата е „нова“, „конкретна“ и „напредна“.

Поранешниот главен аналитичар на Данската одбранбено-разузнавачка служба, Јакоб Карсбо, рече дека одлуката на ПЕТ јавно да зборува за ова би можела да има цел да прати порака до Русија дека данските власти се свесни за нејзините активности.