Италијанската премиерка: Здравиот разум преовлада откако ЕУ се согласи на заем од 105 милијарди долари за Украина

ИСТАНБУЛ (АА) - Италијанската премиерка Џорџа Мелони денес изјави дека здравиот разум преовладал откако лидерите на Европската Унија (ЕУ) се согласиле да ѝ обезбедат на Украина заем од 90 милијарди евра (105 милијарди долари) за покривање на нејзините потреби за следните две години, пренесува Анадолу.

„Драго ми е што преовлада здравиот разум, што успеавме да ги обезбедиме потребните ресурси, но со решение што има солидна правна и финансиска основа“, изјави Мелони за новинарите по состанокот на Советот на ЕУ, објави АНСА.

Нејзините изјави дојдоа откако на Европскиот совет, по неколку недели интензивни преговори, лидерите на ЕУ се согласија да ја финансираат Украина преку задолжување на пазарите на капитал за 2026 и 2027 година.

Договорот беше постигнат откако земјите членки не успеаја да дојдат до консензус за директно користење на замрзнатите руски средства за поддршка на Киев, изјави претседателката на Европската комисија, Урсула фон дер Лајен.