Катар повика на заштита на морепловците и безбедност на поморската пловидба по иранските напади

ИСТАНБУЛ (АА) – Катар денес упати итен повик за заштита на морепловците и обезбедување на меѓународната поморска пловидба по серијата ирански напади врз комерцијални бродови во стратегискиот Ормуски Теснец, јавува Анадолу.

Обраќајќи се на вонредниот состанок на Меѓународната поморска организација (ИОМ) во Лондон, амбасадорот на Катар во Обединетото Кралство, Абдула бин Мохамед, ги осуди иранските напади врз Катар и арапските земји, нарекувајќи ги „кршење на државниот суверенитет и на принципите на Повелбата на Обединетите нации“.

„Овие напади директно влијаат врз безбедноста на поморската пловидба, ги загрозуваат животите на невините морепловци и ја загрозуваат стабилноста на една од највиталните поморски маршрути во светот“, се наведува во изјавата на амбасадорот пренесена од Министерството за надворешни работи на Катар.

Тој ја нагласи итната потреба од „заштита на морепловците и зачувување на меѓународната поморска безбедност и слободата на пловидба, вклучително и во Ормускиот Теснец во согласност со меѓународното право“.

Дипломатот ја потврди поддршката на Доха за напорите на ИОМ и земјите членки насочени кон зајакнување на поморската безбедност.

Претходно денес британската Агенција за поморски трговски операции (УКМТО) соопшти дека еден брод бил погоден од проектил на околу четири наутички милји источно од индустрискиот град Рас Лафан во Катар.

Речиси истовремено друг брод се запалил откако бил погоден од проектил на околу 11 наутички милји источно од пристаништето Кор Факан во Обединетите Арапски Емирати.

Регионалните тензии се зголемени откако Израел и САД на 28 февруари започнаа заедничка офанзива во Иран, при што досега се убиени околу 1.300 лица, меѓу кои и тогашниот врховен лидер Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Заливот каде што се наоѓаат американски воени бази, предизвикувајќи човечки жртви и штета на инфраструктурата, истовремено нарушувајќи ги глобалните пазари и авиосообраќајот.