Betül Yılmaz
01 Декември 2025•Ажурирај: 02 Декември 2025
РАМАЛА/ИСТАНБУЛ (АА) – Денес започна меѓународна кампања со која се бара ослободување на палестинскиот лидер Мерван Баргути, кој се наоѓа во израелски притвор од 2002 година, јавува Анадолу.
Баргути (66), висок функционер на движењето Фатах предводено од претседателот Махмуд Абас, се смета за една од најистакнатите фигури на палестинската политичка сцена.
Тој отслужува пет доживотни казни во израелските затвори од 2002 година по обвиненија поврзани со Втората интифада, која започна во 2000 година.
Мукбел Баргути, братот на затворениот лидер, за Анадолу изјави дека кампањата е повторно започната со истовремени настани во Лондон, Јужноафриканската Република, Франција, Италија, арапските земји, како и во неговиот роден град Кобар, на окупираниот Западен Брег.
„Кампањата е дел од постојаните напори од моментот на неговото приведување за да се изврши притисок за негово ослободување“, рече тој.
Како дел од кампањата, викендов во Лондон беа одржани неколку настани, меѓу кои демонстрации и изложба на слики и цртежи со кои се бараше ослободување на Баргути.
Едно од местата за овие собири беше Франција, земјата што му додели на Баргути „почесно државјанство“ во повеќе од 50 нејзини општини.
Група британски активисти, исто така, го посетија градот Кобар, северозападно од Рамала, во саботата, како дел од кампањата за ослободување на Баргути.
Уметник по име Џими наслика мурал со ликот на Баргути и натписот „Ослободете го Мерван“ на локално фудбалско игралиште.
Мукбел додаде дека кампањата се организира во соработка со организациите за човекови права и со учество на добитници на Нобеловата награда за мир.
Тој повика да се забрзаат напорите за ослободување на палестинските затвореници во израелските затвори, „бидејќи повеќе од 90 лица се убиени“ од октомври 2023 година.
„Стравуваме за животите на затворениците во израелските затвори, каде што се соочуваат со тешки здравствени и хуманитарни услови, тортура и убиства“, додаде тој.
Според групите за затворенички прашања, Мерван Баргути бил физички нападнат од израелските војници во затворот и претрпел повеќекратни скршеници на ребрата.
Баргути, кого многумина го гледаат како единствената личност што може да ги обедини сите палестински политички фракции, беше исклучен од списокот на палестински затвореници ослободени со договорот за прекин на огнот кој стапи на сила во Газа на 10 октомври.
Договорот го прекина двегодишниот израелски напад во кој се убиени повеќе од 70.000 Палестинци – најмногу жени и деца – а над 171.000 се повредени од октомври 2023 година.
Првата фаза од договорот предвидува ослободување израелски заложници во замена за палестински затвореници, како и планови за обновување на Газа и создавање нов механизам за управување без учество на Хамас.
