Речиси половина од Германците очекуваат канцеларот Мерц да замине од функцијата до крајот на годината

Речиси половина од германските гласачи очекуваат канцеларот Фридрих Мерц да ја напушти функцијата до декември, покажува анкета на „ЈуГов“, зголемувајќи го политичкиот влог во пресрет на неделните покраински избори, пренесува Анадолу.

Репрезентативната анкета, објавена доцна синоќа, покажа дека 48 отсто од испитаниците не очекуваат Мерц да остане канцелар до крајот на годината. Околу 31 отсто очекуваат тој да остане на функцијата, а 21 отсто не се определиле.

Анкетата беше објавена во пресрет на изборите во источната покраина Мекленбург-Западна Померанија и во покраината-град Берлин во недела, каде што анкетите покажуваат дека Христијанско-демократската унија (ЦДУ) на Мерц би можела да претрпи значителни загуби.

Во најновата анкета на ЗДФ за Берлин, ЦДУ има околу 20 отсто поддршка, во споредба со 28,2 отсто на изборите во 2023 година и ризикува да ја загуби власта во главниот град. Социјалистичката левица води со 22 отсто, што отвора можност за трипартиска влада без ЦДУ.

Во Мекленбург-Западна Померанија, ЦДУ се соочува со уште еден неуспех, со околу 6 отсто поддршка во најновите анкети, што е блиску до изборниот праг од 5 отсто потребен за влез во покраинскиот Парламент. Најновата анкета на ЗДФ покажува дека левoцентристичката Социјалдемократска партија (СПД) има 37 отсто во источната покраина, а АфД, која се спротивставува на миграцијата, 36 отсто.

Иако локалните прашања и натаму ги обликуваат покраинските избори, голем број набљудувачи сметаат дека падот на партијата на три покраински избори овој месец е дополнително засилен од слабата работа на Мерц на функцијата, со што се зголемува притисокот во неговата партија да се повлече.

Високи функционери на ЦДУ планираат внатрепартиска средба во понеделник. Пратениците од ЦДУ и нејзината баварска сестринска партија ЦСУ треба да се состанат по два дена.

Евентуалната промена на раководството на ЦДУ не би значела автоматско распуштање на Парламентот или распишување национални избори. Доколку внатрепартискиот притисок го принуди Мерц да се повлече, Бундестагот би можел да избере нов канцелар без одржување национални избори.