Студија: Граѓаните од други земји од ЕУ се соочуваат со дискриминација во Германија

КЕЛН (АА) - Неодамнешното истражување спроведено во Германија откри дека луѓето што пристигнуваат од други земји членки на Европската Унија се соочуваат со дискриминација во земјата, јавува Анадолу.

Резултатите покажуваат дека повеќето граѓани на ЕУ што живеат во Германија, особено од Романија и Бугарија, се соочиле со обесправеност и исклученост, според најновата студија нарачана од германската Влада, а спроведена од Универзитетот од Тубинген преку социјалните мрежи.

Водечкиот истражувач на студијата, Бернхард Бокман, истакна дека само 23 отсто од испитаниците изјавиле дека никогаш не се почувствувале запоставени или исклучени.

Во меѓувреме, 63 отсто од испитаниците пријавиле дека ретко или повремено имаат вакви чувства, а 14 отсто изјавиле дека често или многу често се соочуваат со чувство на обесправеност или исклученост.

Повеќето граѓани на ЕУ имаат грижи, особено поврзани со вработувањето.

Натали Павлик, комесарка на Сојузната влада за миграција, бегалци и интеграција и член на Бундестагот, исто така, ги коментираше наодите.

Таа упати критики за состојбите во секторите, како што е нега за стари лица, каде што голем број работници се вработени на позиции под нивното ниво на квалификации поради непризнавањето на нивните дипломи и професионални квалификации.

Павлик упати дополнителни критики поради исклучувањето на граѓаните на ЕУ од курсевите за интеграција и јазик, нагласувајќи дека владеењето на јазикот е клучен фактор за социјално учество и напредок во германското општество.

Таа истакна дека овие ограничувања влијаат врз околу 130.000 лица, меѓу кои и приближно 37.000 граѓани на ЕУ, кои немаат пристап до курсевите за интеграција.