Турција ја проширува истрагата за падот на авионот во кој загина началникот на либиската армија

АНКАРА (АА) – Истрага за падот на авионот во кој во вторникот загинаа началникот на армијата на Либија и уште седум лица е поведена од Основното јавно обвинителство во Анкара, соопштија извори и официјални лица за Анадолу.

Истрагата се спроведува под координација на заменик-главен јавен обвинител и четворица јавни обвинители.

Приватниот авион од типот „Фалкон 50“ се урна кратко по полетувањето од аеродромот „Есенбога“ во Анкара, на лет кон Триполи, главниот град на Либија.

Авионот беше пронајден околу два километра јужно од селото Кесикавак, во округот Хајмана, во провинцијата Анкара.

- Аутопсија, навики на спиење, одржување: Секој детаљ се испитува

Како дел од истрагата, велат изворите, областа каде што се урна авионот е ставена под безбедносен периметар и заштита.

Сите остатоци од леталото, вклучително и црната кутија – клучен доказ во вакви случаи – се обезбедени.

Во меѓувреме се спроведуваат обдукции и токсиколошки анализи за да се утврдат точните причини за смртта на лицата што биле во авионот. Постапките со телата продолжуваат во Дирекцијата на Институтот за судска медицина во Анкара.

Истражителите, исто така, внимателно ги испитуваат околностите поврзани со пилотите пред несреќата.

Анадолу дознава дека се проверуваат нивните навики за спиење, исхрана, можна употреба на алкохол или лекови, како и психолошката состојба.

Обвинителството побарало и извештаи од технички експерти за да се утврди дали авионот бил технички исправен за летање.

Под посебнo испитување е ставена и одговорноста, како и евентуалните пропусти на персоналот што го извршил последното сервисирање на леталото.

Во рамките на истрагата запленети се и видеоснимките од аеродромските камери, а целата радиокомуникација меѓу контролната кула и авионот е додадена во предметот.

Дополнително ќе бидат вклучени технички вештачења за да се утврди дали резервните делови вградени при одржувањето ги исполнувале пропишаните стандарди.

Исто така, земени се примероци и од цистерната за гориво и од остатоците на авионот, со цел да се исклучи можноста за загадено гориво или употреба на несоодветен тип гориво.

Побарани се и локални метеоролошки извештаи за временските услови во моментот на несреќата.

Надлежните наведуваат дека доколку истрагата утврди дека падот бил предизвикан од структурен дефект или конструкциски пропуст, кругот на одговорност ќе биде проширен во согласност со наодите.