Gözde Bayar
05 Октомври 2020•Ажурирај: 06 Октомври 2020
БАКУ
Азербејџанскиот претседател, Илхам Алијев, денес изјави дека Турција треба да учествува во процесот на решавање на неодамнешниот конфликт меѓу Азербејџан и Ерменија во Нагорно Карабах, јавува Агенција Анадолија (АА).
„Турција, која е во својата силна позиција во меѓународната заедница, треба да учествува во процесот на решавање на конфликтот во Нагорно Карабах“, изјави Илхам Алијев.
Нагласувајќи дека напредните вооружени беспилотни летала (UAV) на Турција го покажале потенцијалот на земјата, Алијев рече дека беспилотните летала помагаат да се намали бројот на жртви во зоната на конфликтот.
Тој, исто така, нагласи дека Ерменија се обидува да ја турне Русија во војна напаѓајќи ги азербејџанските територии.
„Ерменците живеат во Азербејџан. Ние немаме проблем со ерменскиот народ. Ерменците се заложници на нивната сопствена моќ“, изјави тој, додавајќи дека тие ќе живеат заедно во Нагорно Карабах кога политиката на ерменска окупација ќе се заврши.
Пограничните судири избувнаа на 27 септември, кога ерменските сили започнаа со напади врз азербејџанските цивилни населби и воени позиции, кои резултираа со жртви.
Односите меѓу двете поранешни советски републики се тензични од 1991 година, кога ерменската Војска го окупираше Нагорно Карабах, меѓународно призната територија на Азербејџан.
Четири резолуции на Советот за безбедност на ОН и две резолуции на Генералното собрание на ОН, како и многу меѓународни организации бараат повлекување на окупациските сили.
Групата Минск на ОБСЕ, со која копретседаваат Франција, Русија и САД, беше формирана во 1992 година, со цел изнаоѓање решение за конфликтот, но досега без резултат. Издејствувано е примирје во 1994 година.
Франција, Русија и НАТО, меѓу другите, повикаа на итен прекин на судирите во окупираниот регион.
