Servet Günerigök
19 Септември 2022•Ажурирај: 20 Септември 2022
ЊУЈОРК (АА) - Турската прва дама Емине Ердоган вчера во Њујорк ја доби наградата од водечката муслиманска коалиција за нејзините хуманитарни напори, јавува Агенција Анадолија (АА).
На Емине ѝ беше доделена „Исклучителната хуманитарна награда“ за време на церемонијата организирана од Советот на САД за муслимански организации, коалиција на национални, регионални и локални муслимански групи.
На уште пет муслиманки им беше доделена „Наградата за извонредни достигнувања“ за нивната работа во науката, зајакнувањето на улогата на жената во општеството, новинарството и за одговорот на Ковид-19.
„Среќна сум што сум со вас по повод оваа многу значајна церемонија на доделување. Ја прифаќам оваа награда во име на мојата земја, која е совеста на светот“, рече Емине Ердоган во својата изјава на церемонијата.
Нагласувајќи дека Туркије има наследство на цивилизација каде што филантропијата е на највисоко ниво, таа додаде: „Нашата религија ни кажува дека најдобрата конкуренција меѓу луѓето е да се натпреваруваат во добри дела. Во оваа смисла, нашиот рекорд е полн со примери на хуманитарна трка што ги импресионира луѓето.“
Таа потсети дека Туркије продолжила да биде најдарежливата нација според Извештајот за глобална хуманитарна помош за 2022 година, истакнувајќи дека работеле на тоа да бидат први кои стигнале до локации за да им помогнат на оние на кои им е потребно без разлика на нивната религија, јазик или раса.
„Ја обновивме довербата во врска со тоа дека љубовта и милоста можат да бидат карактер на една земја“, рече Емине Ердоган.
Таа рече дека Туркије ја продолжува својата хуманитарна помош не само на билатерално ниво со државите, туку и преку ОН, и дека исплатила 7,7 милијарди долари помош за 122 земји, вклучувајќи ги Сирија, Сомалија и Палестина во 2021 година.
Туркије, исто така, работи на задоволување на медицинските потреби на оние кои имаат потреба во „кревките“ области, рече Ердоган, повикувајќи се на болниците изградени во Судан, Сомалија и Бангладеш.
„Искуството со хуманитарната помош на Туркије е многу повеќе од надворешна политика“, рече таа.
Ердоган помогна националните проекти да го поттикнат образованието на девојчињата и жените, започна проекти за здравствена заштита за деца, жени и бегалци и го иницираше проектот „Нула отпад“ во 2017 година за да се потенцираат климатските промени и загадувањето.
Првата дама рече дека бројот на бегалци во светот надминува 100 милиони со војната во Украина, што во извештајот е означено како „драматична пресвртница“.
„Како што знаете, нашите земји низ историјата биле безбедно засолниште за луѓето кои бегаат од војна и прогонство. Ги отворивме вратите на ова засолниште и за нашите браќа и сестри од Украина“, додаде таа.
Првата дама, исто така, отпатува во Мјанмар во 2012 година и ги посети бегалските кампови на Рохинџите во Бангладеш во 2017 година и покрај предизвикувачката ситуација тогаш.
Ердоган го поддржува и зајакнувањето на жените во Африка. Таа посети повеќе од 20 африкански нации помеѓу 2014-2020 година, вклучувајќи ги Алжир, Етиопија, Сомалија и Танзанија.
- Други наградени муслиманки
Ајша ал-Адавија, основач на „Жена во исламот“, организација на муслимански жени што се фокусира на човековите права и социјалната правда, беше наградена за нејзиниот активизам за човековите права и социјална правда. Наградата ја доби од Ердоган.
Ајша Мустафаа, која работи како уредник на неделниот весник „Муслимански журнал“ од јануари 1989 година, беше наградена за подобрувањето на улогата на жената во општеството.
Узма Сајед, која е претседател на Работната група за Ковид-19 во Медицинскиот центар на болницата „Гуд Самаритан“ во Њујорк, ја доби наградата за нејзиниот одговор на пандемијата на Ковид-19.
Тахани Амер, програмски извршен директор на Одделот за наука за Земјата во Дирекцијата за научна мисија при НАСА, беше наградена за нејзиниот придонес во науката.
Тахера Рахман, муслиманка новинарка, беше наградена за инспирација на младите муслимани да се занимаваат со новинарство.
