Американскиот државен секретар Рубио пристигна во Истанбул за преговорите меѓу Русија и Украина

ИСТАНБУЛ (АА) - Американскиот државен секретар Марко Рубио пристигна во Истанбул за да учествува на мировните преговори меѓу Русија и Украина, јавува Анадолу.

Рубио и неговата делегација беа пречекани на аеродромот „Истанбул“ од генералната конзулка на САД, Џули А. Иде, како и други официјални претставници.

Делегацијата предводена од Рубио ќе учествува на трилатералниот состанок Турција-САД-Украина што ќе се одржи во претседателската канцеларија во палатата Долмабахче во 10:45 часот по локално време.

Планирани се серија состаноци во различни формати: трилатерални преговори меѓу САД, Украина и Турција, како и Русија, Украина и Турција, според извори од турското Министерство за надворешни работи.

На состаноците ќе учествуваат турскиот министер за надворешни работи Хакан Фидан, американската делегација предводена од државниот секретар Марко Рубио, украинската делегација предводена од министерот за одбрана Рустем Умеров и руската делегација предводена од Владимир Медински, советник на претседателот Владимир Путин.

Рубио рече дека американската делегација ќе се сретне со висока делегација од Украина и ќе учествува во преговорите меѓу Русија и Украина.